白菜豬肉灌湯餃子@思念

前陣子試過思念牌既三鮮灌湯餃子覺得味道唔錯, 想再試下第隻味, 點知一路都唔見有得再賣, 直至今天又發現佢返來喇, 於是第一時間楝左包白菜餃黎試下先.

睇下幾脹卜卜, 入面一定好多餡喇.

煮熱後更圓滾滾咁, 又脹又大隻, 低食喎.

這款餃子入面好多菜架, 最啱d健康一族, 除左菜入面唔知仲有d咩, 好爽口咁, 另外入面d肉唔肥架, 口感幾好, 我諗尼個可以再返買.

九代日本料理@旺角

今年生日同泡泡茶去左九代日本料理食, 為的是這裡肥美的三文魚刺身, 佢地d三文魚真係幾正架, 其他嘢就麻麻地, 但地方唔算太大, 又要同人撘檯, 其後好在咁啱可以轉到去死角位坐, 可以比我地慢慢咁傾下內心世界, 不過...............有d事真係好難用三言兩語講得晒既.

三文魚刺身

炸軟殼蟹

炸雞軟骨

唔係好記得個名, 其實只係一個豆腐海鮮湯.

地址: 旺角通菜街華發大廈地下

天下壽司@尖沙咀

五月之星飯局 - 今次黎到尖沙咀區既天下壽司, 一行十二人有幾位已經食過多次, 極力推介的, 這店本身並不多人, 所以沒有大檯子供應, 他們都是用細方檯併合而成的一張大長檯, 這做成了我們談話的不便, 連起菜都有問題, 日本嘢通常細細碟咁, 我地十二人喎, 唯有每款order二至三份啦, 這晚又講又食, 真的過得好開心, c&f這班朋友永遠都覺得佢地又做得又玩得又食得既. keep in touch啦.

以下圖片, 只熟其中一部份, 因卦住食同講, 有好多都唔紀念影, 唯有睇住咁多啦.

這個叫發光魷魚刺身, 發光...........究竟點解叫發光呢?????

雜錦刺身

雜錦壽司

雜菜火焗

天婦羅喬麥麵

上: 牛肉卷    下: 蟹子軟殼蟹卷

鰻魚炒飯

由上至下: 魷魚壽司, 龍蝦蟹子壽司, 蟹膏壽司, 海葡萄壽司

最後c&f還送上一張有簽名的紙巾給我作為生日紀念的. (多謝晒, 咁多位)

地址: 尖沙咀柯士甸道122號麗斯中心UG/F

幫到人的那份滿足感

2008年5月12日, 中國四川省發生8級大地震, 廣泛地區受到破壞, 死傷無數.

宣明會即時招募義工, 於「四川地震救援」街頭籌款, 我從c&f得知這訊息後, 第一時間便度期幫手.

首天幫忙, 一早便到達中環萬邦行等counter setup, 其後被分派負責帶著箱子在街上向途人募捐, 著上宣明會義工背心, 拿著箱子, 便跑到老遠的太平行去.

第一次企在街上問途人要錢, 感覺真的不好受, 平時音聲細氣的我要在街頭上大聲叫囂, 倒有點不習慣, 但不習慣歸不習慣, 應承了幫忙, 便要盡能力做到最好, 因為另一方面是背著c&f的名義為宣明會工作的, 要代表著c&f對別人的承諾, 認真, 不馬虎的態度.

最初企到街上有點不知所惜, 但當第一個途人自動走過回捐款後, 心定了下來, 便開始一一舉箱向他們募捐, 街頭上見到的全是西裝骨骨老闆形和典型穿上2-3吋高跟鞋的OL, 向他們募捐真的不易, 十居其九都說已在公司捐了, 此時唯有報以薇笑再說聲多謝吧了, 但總有一些人特別熱心的, 捐了一次又一次, 說只是少少心意. 捐完再來捐的. 另外, 最意料不到的, 就是企在街上派傳單的姨姨, 我總覺得她們的薪金並不高, 不敢向她們募捐, 奇怪地其中一位看了我差不多整個鐘後, 居然主動的過來捐贈, 還叫了她另外幾位姊妹過來, 她說辛苦了, 她們每天企在街上, 知道感覺如果, 但總不要她們開口叫囂, 見我叫到喉嚨沙啞, 吃著喉糖還要堅持的樣子, 不得不佩服喎, 咁~~我就賺了她們的一點支持.

其後, 到了尖沙咀金巴利道附近募捐, 有了前一天的經驗, 胆大起來了, 不再害羞, 每每見人便舉箱, 叫喊著, 薇笑著, 這樣搏得途人熱烈的回報, 不足一小時, 捐款已塞滿整個箱了, 我不會就此停下來的, 再多的都會繼續塞入去.

除以上提過派傳單的姨姨外, 還有件令我安慰的, 就是一位婆婆走過來把她錢包裡全部的紙幣捐晒出來, 最後還拍著我的膞頭說”之後靠晒你地喇”, 我聽完之後更加賣力. 還有一位在街上派recruit的叔叔, 見著我的錢箱滿滿的, 不停地說”快拿回去換個箱子吧”, 說了好幾次, 我都無理會他, 後來他揮手叫我過去, 初時都不以為然, 只見他拿著五十元正等待我拿箱過去, 見他的一點熱誠, 令我體會到捐助真的無分階級, 無分貴賤, 有心才是最重要.

這幾天雖辛苦, 但做得好開心, 未試過這種滿足的感覺, 滿足的不只是箱裡的錢, 而是幫人得到的那份滿足感, 只有自己才能領悟得到的.

母親節 - 怪怪的海綿蛋糕

剛過去的母親節, 和媽出了旺角飲茶, 那天通街都是人, 想找間有位的酒樓真不易啊! 立時找妹幫手, 她一出馬即時有位, 就在唔駛等位既情況下去了陶源歎左佢地好出名既鮑汁荷葉飯喇, 真係一d味精都無喎, 好清, 啱晒我媽食啦.

除左出去飲茶外, 當然少不了自家整作啦, 近幾年, 媽開始食得清淡, 問她想吃咩蛋糕, 佢只會答清清地, 簡簡單單便可以啦, 於是做左這個牌形的海綿蛋糕, 足足有12"x10"咁大架, 佢仲好搞笑咁, 係酒樓度放係枱上, 不時咬一口, 不時咬一口咁.

其實個蛋糕好唔好食, 靚唔靚都係次要, 最開心係見到佢食得咁開心既表情.

粟米馬蹄菜肉餃@淘大點心

有日行過惠康見到尼款好搶眼包裝既水餃做緊promote, 買左幾包返屋企, 放左幾日, 心思思想攞出黎試下味, 今日既午餐就非佢莫熟啦.

今次做特價, 多送2隻, 普通一包入面應該只得8隻, $23.9/3包

皮唔算厚, 餡多.

一口咬落去已經聞到陣陣粟米味, 咬落口仲好爽添, 馬蹄同粟米都係爽口既, 唯獨是d菜肉比較鹹左d, 但中和返粟米同馬蹄既無味, 尚算好食啦, 下次試埋其他口味再話你地知啦.

六國酒店西餐廳@灣仔

六國酒店 - 經常撘車經過既地方, 諗都無諗過會入去既地方, 今次就揀左尼間.

一坐低即時就行去魚生櫃睇睇, 點知............................咁少既, 得2款魚+八爪魚刺身乍, 搞錯呀, 的三文魚又唔靚添, 點食呀.

細細碗既冷麵 - 尼碗嘢表面就幾好喇, 面頭係d辣魚仔同xo醬, 但成個麵總括黎講都係"唔味"

這碟熱食包括: 牛尾(無味), 魚柳(肉好碎), 豬頸肉(算係最好食既一款), 烤腸仔(一般), 烤牛仔肉(好鞋), 烤西羊腸(好鹹),

凍食: 齋, 泰式粉絲(凍食中最好食), 魚卷(疑似蟹柳), xx甜蕉(個白汁幾ok可一試), 翡翠螺(大隻夠凍), 煙三文魚(比刺身更好味)

蘋果批 (粉厚, 餡少)

方形碟: 木槺布丁(夠軟滑, 但太甜), 圓形碟: 士多啤利慕絲 (慕絲好硬)

相~只影得咁多, 因為有個朋友工作上遇到問題, 我們幾個全程都為佢做出評估, 講多過食, 今餐有少少唔低添, 算啦, 有時都唔係全為著食的, 一班朋友坐下傾下都幾舒適丫, 不過平心而論, 這間六國buffet真係麻麻, 應該唔會再返黎食lu, 食物款式太少了.

地址 :

灣仔告士打道72號六國酒店

義工服務-長者防跌安全日

地點: 黃大仙下二村     日期: 2008年5月3日     時間: 14:30-17:30

長者防跌安全日是"房委會"及"寰宇希望"聯手合辦的, 目的是為長者防跌作出街頭評估, 從而識別有高危跌到機會的長者進行家居改善及給與助行器具.

這天天氣非常悶熱, 但我們義工一行數人14:00前已經到達目的地做setting.

第一站: 為合資格長者登記

第二站: 量度血壓及磅重 (上workshop課時, 曾經聽過導師講上壓/下壓: 140/90以上為血壓高, 90/60以下為血壓底) 下圖所見, 這人仕血壓算是合格, 但比平常人真的偏低了些少.

第三站: 坐起身測試 (對於一些易跌的長者, 交叉手起身真的不易架.)

左: 平衡力測試 (要合眼企定在這地毯的腳印上, 少的平衡力都做成身體左右搖擺.) 

右: 反應測試 (垂直拿著跌下來之鋁管, 看看能接著鋁管的那個部份.)

這次活動遇到的人和事有的相當有趣, 其中一位婆婆更令我最為難忘, 當她做完測試後, Ronald為她講解時, 她只會帶著微笑的不停答道”我唔知你地做咩呀”, 於是我又用一把聲嘶力竭的聲音再講多次, 無奈她還是只對著我們笑, 不知道我們正在做什麼, 最後還是由阿dick出馬至搞得掂, 原來這位婆婆不但要用好大好大聲同佢講嘢, 還要一句一句清清楚楚的才能聽到我們講的話, 沒有經驗的我倆怎樣都做不好, 無論怎樣聲嘶力竭, 但就是沒有做到那慢~慢~慢~的對她講話, 她就完完全全的聽不入耳, 之前未試過和聽力有問題的人接觸, 真想像不到要這樣和她們對話的

另外, 還有一些很精靈的長者, 像個小孩子般, 在測試時, 問他慣用的是那隻手, 有幾位都佻皮的回答, 我左右手都慣用喎, 咁測邊隻先, 真的好利害啊, 年青人都不是個個能左右手都慣用喎, 這天已給我遇到3個了.

簡易午餐: 沙爹羊肉米粉

之前比blog友muimuimui發現我經常食一些冰鮮食物, 今日就改改作風, 煮返個米粉食下先.

之前有包小肥羊未食晒喎, 攞返出黎, 再煮個米粉, 加返少少沙爹醬, 咁咪搞掂囉, 哈~哈~.....................又一餐喇.

誠壽司@鰂魚涌

日本食物係我人生中既至愛, 尤其是生食, 那種冰涼, 清甜, 爽口既感覺~~~~正.

三文魚腩刺身 ($31) - 花心思既刀工, 另你食落更覺爽口, 件件肥美, 冰凍, 但實在太細件喇, 可唔可以加長三文魚腩既長度架, 最多比你收貴少少啦.

三色刺身 ($56) - 十多款魚生中自選三款, 當中包括: 三文魚, 吞拿魚, 鯛魚, 墨魚, 油甘魚, 劍魚腩, 鮮帶子, 特甘蝦, 北寄貝, 八爪魚及時令魚生等.

經過多次選擇都未能揀到心水款式 (原先選的都說沒貨了), 最後所選剌身如下:~

說真的, 材料比其他舖新鮮好多, 但今次還有一點不足之處, 就是這三款刺身都不夠冰凍, 食上口感覺有點暖暖的, 相信是魚生的冰已經溶化, 但未回雪足夠時間所至, 這點希望有待改善.

壽司方面選擇了幾種最common既款式,

左上: 三文魚壽司($14) - 這兩件還算可以, 但其後再order的已經沒有這水準了.

右上: 甘蝦壽司($14) - 用上了多隻甘蝦製作, 比其他舖低食好多.

左下: 鰻魚壽司($14) - 不過不失, 算幾滿意啦.

右下: 蝦子壽司($14) - 最滿意當然係蝦子冰凍, 紫菜食落爽口, 咬上口, 整件都食到"索索"聲.

還有多款壽司價錢由$12(芝麻八爪魚)-$59(牡丹蝦)可供選擇.

炸軟殼蟹 ($39) - 一碟六件, 炸得相當鬆化, 粉醬不太厚, 咬落啖啖軟殼蟹, 不似其他的只食到外層的粉醬感覺.

串燒帆立貝 ($19) - 帶子十分大隻, 燒工一流, 無燒到乾柴既感覺, 食落還有濕潤感.

食過以上幾款食物, 覺得這間壽司店內的師夫明顯比出面大舖的還要好功夫啊.

地址: 鰂魚涌海光街8號D7鋪 TEL: 2563 2388

PS: 店內張貼告示 - 因物料價格上升, 全場order會以價目表上價錢加$1計算