金菇牛肉卷

雨~足足落了一整個月, 悶悶的, 今個weekend繼續都係~~~~落雨..落雨.

無出街, 又無咩嘢做, 唯有搞搞新意思啦. 想做很久的金菇牛肉卷, 終於趁這個無聊的weekend動手了, 雖然是第一次, 但因這個餸並唔難做, 出來的味道算不錯吧.

另外, 還做了一小卷一小卷的黃瓜壽司, 這落雨天唔想食飯, 弄個壽司吃吃便算了.

簡易晚餐: 亂打燒雞翼 + 午餐肉炒娃娃菜

落左咁多日雨, 搞到個人都無咩心機添, 覺得有d悶悶地, 又係時候想整d嘢黎食下喇, 好耐無去bbq, 好掛住d燒雞翼既味道添, 唯有自己動手做做啦.

這個亂來的燒~~~~唔係應該係~焗~雞翼都算幾滿意, 味道仲好好添, 甜甜地, 又有燒既風味, 無諗過亂來都有咁既成績喎, 食多兩舊先, hehe~~

另外還做了個簡單炒菜, 你地一睇就已經知有幾簡單啦.

亂來燒雞翼做法如下:

1) 雞翼先用鹽水浸洗, 後抹乾水備用.

2) 迷迭香, 鹽, 糖, 蜜糖, 生粉, 老抽適量加入抹乾之雞翼, 室溫放1小時.

3) 先預熱焗爐, 用220度火焗10-15分鐘, 其間可有淨下來的汁料加少許蜜糖掃於雞翼表面回爐繼續焗, 可反轉重覆多次掃上, 待雞翼轉至金黃色, 即可.

八號風球下的bunch

尋晚已經掛左八球風球喇, 心知今早應該無咁快下到波既, 但又應該唔會掛足全日八號喎, 今朝咪瞓晏少少至食早餐囉.

平時朝早都唔會特別去煮d咩食既, 不過今朝晏食早餐, 又唔想食幾次嘢, 唯有整多少少嘢食, 兩餐當一餐食, 晏d再食下午食囉.

屋企能搵到既物資入面最能當早餐的雞蛋同煙肉, 另外仲加多左件來只元朗既老婆餅添. 飽飽 lu.

B記涼粉

上星期老遠咁走左入元朗, 為的是探這個初生B, 記得初聽到B媽話有左, 第一時間都替她高興, 直至4月尾與B媽MSN時更知道呀B快將來臨, B媽還打趣的說: 我會忍到五月才生的 (事源因為我之前同佢講過希望呀B同我一日生日麻), 點知..................B媽真係忍過左4月喎, 心諗有機會喇, 但最後當然事與願唯, 遲左一日, 算啦都無失望既, 之前只是拿來說說笑啫, 最緊要倆母女平安就得啦.

B媽話唔知點解B女d頭髮好軟, 但又條條棟篤企既.

探完呀B後, 大家都話橫掂入到黎, 不如過B記食涼粉啦, 又好喎.

入到去除左食涼粉, 仲點左芒果河粉,

同榴槤班戟添,

見枱枱客都點這個辣雞翼尖, 我們都來一客吧, 記得多年前食過這店子, 還未見過有雞翼尖食喎, 咩依家越整越多嘢賣既, 有朋友嘗了一口, 嘩! 辣到飛起, 真的幾辣喎, 唔食開辣既朋友就咪掂喇, 但無想像中咁好食, 可能係熱既原因啦, 始終覺得辣雞翼尖凍既會比較好食囉.

蛋撻

尋日整椰撻時, 已將撻皮材料準備多一陪, 好讓我今日整我的至愛 "熱辣辣蛋撻".

好少朋友食過我整既蛋撻架, 原因係蛋撻凍左無咁好食囉, 出爐後唔容易即時送到朋友仔手上, 所以我都好少整, 只係心血來潮時整黎嚐嚐咁啦.

尼d就係前一日整好既撻皮喇, 雪硬左個樣都唔錯喎.

今次整得無咁靚添, 唔知係咪因為個雪皮既關係呢??

蛋水材料: 奶水200g, 糖100g, 全蛋3個, 撻皮材料跟椰撻一樣.

撻皮做法:

1. 將奶油打軟之後, 與糖粉一齊打發.

2. 打發之後加入全蛋繼續打發.

3. 發泡至奶油稍呈乳白色狀即可取下.

4. 將打發的奶油取下, 放入己篩好的低粉中.

5. 利手刮皮與雙手將奶油, 麵粉充分混合攪勻.

6. 一邊拌勻也要一邊搓揉麵糰, 使麵粉與奶油充分結合.

7. 分成多份, 放撻模內壓平即.

蛋水做法:

1. 將奶水稍微煮開後, 加入糖拌勻至糖溶解.

2. 再加入蛋充分攪勻.

3. 拌勻後利用過瀘網將蛋水瀘過.

最後將蛋水倒入撻模中約9成滿即可, 以190度焗25-30分鐘, 完成.

或可參照: 舊有食譜

椰撻

好耐無整椰撻喇, 對上一次已經年幾前, 突然間有d掛住佢添, 於是~~~~~

撻皮材料: 奶油250g, 糖粉125g, 鹽少許, 全蛋1個, 低粉360g (份量已包括蛋撻皮)

餡材料: 蛋1個, 糖40g, 泡打粉5g, 奶油40g, 奶粉10g, 椰絲70g, 水80g

所有材料準備好, 將餡料放入撻皮內, 用200度火入爐焗15-18分鐘即可.

大雨後之墨魚團

c&f 又有活動喇, 今次黎過海鮮墨魚團先, 星期六一大早, 落雨落到~~~~~~~, 好在天公造美, 下就個天好左好多啦.

船黎喇~船黎喇~, 我地等緊你架, 開快d啦.

以下幾位幸運兒都有其收穫, 睇佢地幾咁開心,

唔好見到幾幅相就以為收穫好豐富喎, 其實我地c&f一行42人上船, 就只得幾位幸運兒釣到乍, 成績係............................9條, 差不多每條要分比5個人食架, 每人一口, 好好味架, 正所謂少食多滋味麻.

ps: 勁腰骨痛呀, 全程4個鐘, 永不放棄既我, 無坐過.

宜家傢俬cafe@九龍灣

真係無諗過比d咁既價錢可以食到d咁好味既嘢喎~~~~~~

肉丸+薯片($19), 甜甜酥($9), 咖哩雞批($9)

肉丸+薯片: 大大碟, 仲有成十粒咁多添, d薯片好脆架, 咁既配撘都唔駛$20底啦, 又無加一添.

甜甜酥: 入面無餡既, 只係批面有2片蜜桃同少少汁甜甜地咁, 不過個酥低就做得幾鬆化, 一咬落口成件散晒.

咖哩雞批: d咖哩汁唔太咸, 汁又唔太多, 收得啱啱好, 個批食落唔淋, 有咬口, 幾蚊雞算係咁啦.

杞子桂花糕

材料買左好耐, 但一路都的唔起心肝去整, 終於................落手了.

材料: 乾桂花2g, 片糖半塊, 砂糖60g, 魚膠粉34g, 水600ml, 杞子適量

做法:

1. 乾桂花 + 杞子 + 片糖 + 水放煲內煲滾.

2. 砂糖 + 魚膠粉拌勻.

3. 待乾花杞子糖子煲好後加入2.內攪拌至無粒粒.

4. 待糖水涼後, 放入雪櫃2小時即可.

ps: 初次嘗試之分量, 有待跟進.

屋企做節編@端午節

我媽一向做餸都永不留手, 平時煮餸已經餐餐食唔晒, 做節更不在話下啦, 每次我都要唔食飯去迎合佢d餸, 但你地睇丫, 就算唔食飯都食唔晒檯上既嘢呀, 點搞好.

1. 蒸魚

2. 拜完神既雞

3. 鮑魚拌西蘭花

4. 帶子冬菇拌西生菜

5. 白灼草蝦

6. 拜神用燒肉 (今次超貴, 要$160)

今次係我管束下, 已經少左好多餸喇, 佢本來仲想買蟹, 腰果炒肉粒添, 仲有, 我叫佢唔好攞d湯渣出黎, 今次至可以食少好多, 不過都係食唔晒, 碟雞同燒肉差唔多未掂過一樣.

我既策略係叫所有人進攻左碟蝦先(起碼食完可以攞走個碟麻), 攻擊率達100%, 其係再次攻蒸魚, 都有100%完成率, 繼續就主攻2碟菜, 肉類可以慢慢食, 過一日反炒都可以好好味既, 最後完成度係西蘭花(100%), 西生菜(95%), 燒肉(20%), 雞(1%~只食了2件乍), 成績算係滿意啦.

有咩啟事呢

剛踏入六月不到一星期, 家中的魚魚先後死去3條, 唔知發生咩事呢, 過兩日要去加添幾位新成員至得.

桑寄生蓮子紅棗雞蛋糖水

自從試過源記的桑寄生糖水後, 差不多每星期六都會見到我坐於這小舖內, 真的食過咁多間糖水舖, 最好食的都是這裡, 每踏入門口前, 都想過點其他款式的, 但一坐下, 高佬問要咩呀, 隨口便會道出"桑寄生蓮子蛋"啦.

現今, 物價高脹, 糖水亦不例外, 這個桑寄生糖水已由原本的$19加至$20, 以這平價藥材煲成的糖水竟然買到咁貴, 即令我生起要自己煲的念頭.

主要材料: 桑寄生

配撘材料: 蓮子, 紅棗, 雞蛋

做法: 桑寄生先洗淨, 水滾後連所有材料細火煲1小時, 食前加片糖煮溶即可.

應節午餐

我知好多朋友都唔鐘意食過節既食品, 例如: 新年~年糕, 中秋~月餅, 端午~糉等,  但識得我既都知我最愛這些懷舊食物, 今天已經五月初一, 計起上來還有幾天就端午節, 一於食定糉等過節先.