簡易午餐: 灣仔碼頭珍菇鮮蝦水餃

我一向都係藏姑娘既fans, 佢又出新嘢喎, 點會唔試下丫,

今次尼個珍菇鮮蝦水餃, 比起其他味道少了2隻既, 咁係咪變相加價呢

但煮熟後, 又覺得比起平時食開既大粒左d喎.

第一啖咬落去, 嘩~~~~咁有蝦味既, 再望一望, 哦....原來有咁大隻蝦係入面架, 仲粒粒都有添, 唔卦得少左2粒啦, 應該係成本既問題, 價錢同平時食開既口味劃一.

入面除左有隻蝦外, 仲有好多菇菇(應該係杏鮑菇同菜樹菇)切到一粒粒咁, 尤其是d菜樹菇, 食落口好爽, 好好咬, 無之前食過思念牌果d咁淋, 啱我鐘意咬嘢既人食.

期待已久

昨晚終於齊人喇, 約了小天使及糖張出來dinner, 這個約會可不容易啊! 前前後後差不多用上整個月才成事, 大家都希望找個好坐的地方慢慢傾, 小天使便提議到Pancake Colours Cafe & Bar, 我是第一次來的, 入到去的感覺有點暗暗的, 有點像玩塔羅牌的地方, 仕應為我們安排近窗口位置, 坐得幾舒服架, 一坐低三人即開始說過不停, 一邊說一邊睇memu的情況下, 是是旦旦的點了這個南瓜什菜野菌燴飯.

餐湯: 沒什麼味道, 好淡, 唔好咁啱我, 我比較喜歡酸一點的.

餐飲: 凍香奶朱古力, 尚算可以, 有朱力味之餘還有滑滑的淡奶味, 可能我們太多嘢講啦, 飲到最後, 朱力味開始被沖淡, 才發覺這杯朱古力真的淡了點.

主菜: 南瓜什菜野菌燴飯, 這個返而令我有點意外, 無諗個燴飯裡竟然是由南瓜蓉及芝士包著每粒飯來吃, 每口都能食到我最愛的芝士及南瓜.

最後當然來了餐後甜品啦, 但真的很失望, 沒什麼選擇, 一拿來便是這款慕絲, 心想:是芝麻味還是綠茶呢, 一入口: 嘩! 居然是咖~啡~味, 大佬呀, 可唔可以問清楚先呀, 你估人人都飲咖啡咩, 起碼我唔好囉, 其餘2個朋友都停了手, 我相信大家都對這甜品.........

因為今次約會我沒什麼時間準備, 只用上少少時間做了這幾款曲奇, 佢地見我既嘢食太多喇, 還未試過我的手藝, 就整比你地嘗嘗吧.

我覺得今次唧出來最靚的, 就是這款玫瑰花喇, 唔知你地同唔同意呢?

心動..............

唔知佢能唔能夠令我動心呢?????

待續

簡易晚餐: 螺絲粉

最近天氣實在太熱喇, 咩都唔係好想食/唔想整咁, 不過無里頭咁諗起想食d酸尾尾既嘢喎, 去超市行個圈, 買左這款通心粉 (正確應為螺絲粉)配dolmio番茄醬.

當然要加些少菜or爽口嘢至有口感啦, 青瓜同紅蘿蔔就係我最愛既選擇喇.

煮煮埋埋一大鍋, 但總算食得晒, 梗係啦, 自己整喎, 好好味架, 食前再加多少少黑芝麻, 仲香口, 不過美中不足既係, dolmio隻番茄醬我覺得唔夠酸囉, 下次一於放多兩個新鮮番茄落去至得.

encore 藍莓芝士蛋糕

有朋友搵到份好工, 梗係要賀下佢啦.

一個美味無窮既藍莓芝士蛋糕, 食到所有同事都叫~~~~~~~~~~~~~~~encore.

魚皮角@昌記魚蛋

日日要自己煮午餐食, 食到都唔知食咩好, 尋日又落左去超市掃貨, 見到尼隻魚皮角好似幾正咁, 買黎試下先.

見佢細細粒咁, 等我煮開粉加幾粒落去點綴下.

食落口好似無咩味咁, 但外皮算係ok啦, 好有魚味, 入面d餡好實淨, 唔係食水餃既感覺, 雖然食落口無味, 但總算咬落有d口感啦, 伴著d粉黎食就無問題, 如果只係煮佢唔其他配撘就應該麻麻地喇,

雖然唔係太難食, 但都唔會再買lu, 口味唔係咁啱我囉.

柚子蜜芝士蛋糕

哈~哈~又係我別出心裁之作喇.

芝士蛋糕永遠都係咁深受大眾歡迎既, 知不過無理由次次整同一個款架, 於是我既自創食譜又再次出現喇, 雖然話自創乍, 其實大置上做法同之往都差不多, 至於味道唔錯架, 出黎既效果仲比起之前做既滑好多添.

餅底材料: 麥維他餅4塊, 牛油30g

芝士蛋糕材料: 鮮忌廉76g, 砂糖28g, 魚膠粉2g, 芝士190g, 柚子蜜50g

做法:

1) 餅塊放入保鮮袋內敲碎, 再與牛油溶液攪拌後, 舖入蛋糕模底備用.

2) 鮮忌廉+砂糖放於煲內用中火煮滾, 待砂糖溶解後離火.

3) 魚膠粉用凍水坐溶, 加入2)內.

4) 芝士以隔水加熱攪拌成忌廉狀, 再加入鮮忌廉魚膠液內.

5) 柚子蜜加到芝士忌廉混合物內, 攪拌至所有材料均勻為止.

6) 倒入餅乾模內, 放入雪櫃雪1小時.

7) 取出後在餅面作少許裝飾即可.  

簡易晚餐: 沙爹金菇青口羊肉煲 + 蕃茄雞蛋芝士腸

雖然我愛動手煮食, 但什麼都不董的我, 要煮起飯來總叫人無所適從, 做的就只有這些簡簡單單的餸.

看~~這簡單的兩味餸, 已包含了各種不同的食材來, 我諗這餐尚算可以掛.

你地話收唔收貨先.

上: 沙爹金菇青口羊肉煲 下: 蕃茄雞蛋芝士腸

材料: 雞蛋2隻, 蕃茄2個, 芝士腸適量, 糖, 鹽調味.

做法: 先將雞蛋炒熟盛起, 放油於鑊中炒香蕃茄, 加水煮成蕃茄醬, 用糖, 鹽調味後加入芝士腸同煮, 待汁液差不多煮乾時加入熟蛋炒兩炒, 上碟.

材料: 金菇, 青口, 羊肉片隨個人喜好, 蒜泥調味.

做法: 先下油入沙鍋內, 至油滾落蒜泥爆香, 下青口炒至乾身, 羊肉片與沙爹醬於青口八成熟時放入, 炒出香味後加少許清湯及金菇煮至熟透即可.

鳳梨酥

餡料: 罐頭菠蘿片大罐, 砂糖40g, 麥芽糖1湯匙, 玉桂粉2g

皮料: 低粉120g, 吉士粉14g, 牛油85g, 糖霜28g, 蛋黃1隻.

做法: (可做十二個)

1) 罐頭菠蘿片隔去水份後用叉壓成一絲絲狀, 再搾乾水份.

2) 將所有餡材料倒入小鍋中以中火炒至乾身.

3) 放涼後分成十二小份備用.

4) 牛油+糖霜一同打發, 後加蛋黃及吉士粉混合.

5) 把過篩後的低粉拌入牛油混合物內搓成粉團.

6) 將粉團分成十二份包入餡料, 放入模內造形.

7) 焗爐預熱180度, 焗25分鐘至金黃色即可.