2008年4月30日 星期三

意想不到既~~~~

之前同朋友仔行街, 見到隻公仔真係好鐘意好鐘意架, 但因屋企真的放了太多大型公仔喇, 又唔想亂使錢既關係, 所以無買到.

點知, 個朋友仔尋晚就送左尼個surprise比我, 真係諗都無諗過會同"阿金"有重逢既一日架, 第一時間當然要同佢同床瞓啦, ~~hehe~~好開心呀~~




左: 史迪仔(舊) 右: 阿金(比原有既史迪仔大左一陪)

2008年4月29日 星期二

餃子園@中環

早前, 唔記得左係邊樹睇過有blog友介紹尼間食餃子既舖頭, 話d餃子好好味喎, 一向愛吃餃子既我點會唔去試一試丫.




照慣例我都會點一碗炸醬麵同一碟餃子既, 先講講個炸醬麵($26): 同我平時食開既有好大分別, 一放上檯即聞到好重既麵豉醬味, 顏色黑黑咁, 賣相唔算靚, 食落口比較鹹, 無京香餃的炸醬麵咁清甜.




另外, 點左個白菜豬肉餃($28), 無湯一齊上既, 所以餃子放一陣就凍, 唔夠熱. (還須一提既: 個炸醬麵碗底, 有小許湯架, 平時食係餃子有湯, 碗麵乾身, 尼度就剛好對返, 麵有湯, 餃子乾身, 睇你鐘意咩口味啦.)




餃子食落口餡料尚算豐富, 但肉質唔夠新鮮, 菜既比例較少, 若果菜多少許, 咬落口會爽好多, 餃子唔算太差, 不過出得中環區, 我返而會返上去堅道果間京香餃食囉, 口味比較啱我多d, 除非果日懶唔想行啦, 近近地尼間都可以既.

餃子園地址: 香港中環威靈頓街69號


2008年4月28日 星期一

咳ing~~

饑饉三十營後病倒至今還未好返..........仲要咳幾耐架. 快咳死喇.




不宜食: 蝦, 蟹, 豆, 蛋, 鷄, 鴨, 鵝. 咁.....我仲可以食d咩呢?

咳..................



2008年4月27日 星期日

咖喱大皇@旺角

出親旺角其實都唔知揀咩食好 (太多選擇喇), 行行下, 經過哩間門口, 比佢個名(咖喱)吸引左添, 好耐都未食過喇, 不如就入去試試啦.

晏就2點多入去, 店子裡唔太多人, 只係2枱客, 心諗: 唔通咁唔好食, 點解無人幫親既. 都入左黎啦, 好又一餐, 唔好又一餐啦.




你地睇, 右下角果碟嘢幾大碟, 唔好以為係小菜黎喎, 其實只不過點左個咖哩豬扒飯乍, 碟飯又超大碟, 連個汁都大碗過人既, 一個人點食得晒丫, 好在我地一向都鐘意點一個飯加d小食就算, 如果唔係.................晚飯點食得落呀.




我指既小食, 就係呢碟併盤, 入面有雞肉串, 牛肉串, 春卷同咖哩角, 加埋上圖個飯, 超飽呀.

地址: 旺角豉油街88號

2008年4月24日 星期四

上海菜肉雲吞@四海魚蛋

近幾日, 行過好幾次百佳, 都找不回之前試過的思念水餃 (因為還有很多味道未試麻), 在雪櫃內看上了另一款產品"上海菜肉雲吞", 見到是四海出品, 應該無咩問題卦.




一包只得八隻 ($6.5), 對於我來講, 唔係好夠添, 不過以這個價錢, 尚算低食.




看~真是皮薄餡靚架.




但因為皮太薄既關係, 食落口感返而有點淋淋的, 不太啱我喎.




裡面都幾多菜架, 啖啖咬落去都唔覺得肉既感覺, 最適合的愛菜既人食, 但我就..............

2008年4月22日 星期二

生日快樂

上星期霖霖B生日, 佢爸爸為佢開左個小型生日會 (其實只不過係借生日為名), 幾個人係屋企食左餐日本既海鮮餐, 當中包括既食物如下:




左下: 皇帝蟹 (咁大隻蟹喎, 啖啖肉咁, 梗係啱晒我呢D平時唔多鐘意拆殼食蟹既人啦)

中上: 原隻羅臼海螺貝 (其實哩款嘢都唔知係凍食定熱食既, 有人就咁凍食, 但有的又攞左去"拾"熟先食, 我只係覺得未熟時好鬼"聲"囉)

右上: 特大帶子刺身 (哩個係我飛化黎架, 又凍又大隻, 超正呀, 不過食幾隻就已經好飽LU)

右中: 燒醋鯖魚 (其他人話好食喎, 但我就最怕佢陣味喇, 所以無食, 鯖魚~我真係麻麻地乍)

中下: 特大甜蝦刺身 (又係賣飛化啦, 不過今次解凍過時, 蝦身食落口唔夠凍, 有的淋, 要再雪至食得, 但點雪都係唔夠凍添, 有點失色)

右下: 北寄貝 (平時只會食少量, 因沒有特別好食/唔好食既感覺, 但今次唔同喎, 比去面果D好食好多, 非常鮮甜喎, 一片接一片, 唔想放手添~~)




你地睇下隻帶子有幾特大啦, 差不多2個2蚊咁大架.




話晒都係小朋友生日麻, 上述既食物全部唔啱佢食既, 所以我整左個Yoghurt蛋糕比佢, 點解整個咁簡單既yoghurt蛋糕? 原因霖霖B剛啱學會問人攞Yoghurt食麻, 佢一見人就要買yog~hurt, yog~hurt咁囉.




另外, 仲整左佢好鐘意既"pooh pooh"曲奇比佢, 一路食一路不停咁叫好食~好食~pooh呀~pooh呀~




2歲喇, 大個女啦, 應該識得吹臘獨, 就等你自己黎至得. (平時佢見到人地吹, 佢又要盼吹架)




今次個蛋糕係為左霖霖B整既, 所以一d糖都無落, 全靠3杯優格既甜味, 真係好鬼清, 因為無落糖既關係, 味道變得帶酸一點添. 

2008年4月21日 星期一

饑饉三十 - 下回篇

饑饉三十: 第二天 2008年4月20日 香港仔運動場

天氣終於放晴, 各人都懷著熱切的心情再次回到這大本營繼續如下的活動, 昨天的澤國, 今天已退了不少, 可看回一片綠色的草地.




各組都安排到草地上活動, 一輪跳舞熱身後, 個個都精神充沛, 等著參與各個活動.




打頭陣的是介紹今年一眾饑饉天使, 當中包括: 陳栢豪, 洪卓立, hot cha, 周麗淇, 關智斌, 阮小儀及幾名DJ.




出發到工作坊前, 大會派發一個真英雄的標貼, 各人都把它貼到不同的位置上, 有的貼在面上, 頸上, 手臂上, 手腕上………..我們就貼在這裡吧.




各區的工作坊都有著不同對飢餓孩子糧食不足的原因, 第一個要踏入的就是這個清水難求的活動, 我們會以三人四足的方式運水, 其實真的不易.




運回來的水更是污水來的, 稱不上是一些安全飲用水呢.




第二個workshop係要我們用一個多洞的膠樽運送黃豆, 但不能用手揸著水樽, 而要用四條繩在不可打結的情況下運送出去, 途中更有障礙物欄助, 有時會在途中全部掉下, 這樣就前功盡廢.




另一個是拋豆袋, 由前傳後向後拋送, 途中不可掉下, 如過程順利, 到最後便得到一粒豆, 取得後還要決定豆放落在那個耕地上.




最後才發現我們辛苦得到的豆, 未必能放到合適的耕地, 只有少量的落啱位置, 這就是做成糧食分布不均的情形.




玩到四點多, 運動場中央設置民歌基地, 一班饑饉天使出來表演, fans門齊齊排排坐等聽好歌.




我們數人沒有出去聽歌, 只是留在區內影影相, 自己找些小玩意等.




差不多6點, 大會安排好閉幕音樂會, 全場人開始返回自己所屬區分, 等各饑饉天使出來表演.




看看洪卓立左面的倒數大鐘, 還有1小時3053秒乍.




演唱會途中, 很多人都拿出大會派發的電筒+膠水樽, 製造出很美的螢光棒場境, 好浪漫啊.




到達饑饉的最後1分鐘, 全場人起立, 望著大鐘一同倒數.




最後倒數完畢, 眾台上歌手及DJ打響銅鑼, 饑饉30正式閉幕.




完成30小時饑饉後, 第一時間便有組員取出自製的曲奇來一同分享.




眾歌手及DJ之熱情還未冷卻下來, 眾人舞出台下和我們一齊跳舞及擁抱.




我們更拉龍跳起舞來. 各人就在這歡樂聲隨隨散去.




及後, 我第一時間食到的就是這個熱騰騰的餐肉炒飯, 平時平平無奇的罐頭餐肉, 今天成為美味可口的炒飯來, 超正喎.








饑饉三十 - 上回篇

饑饉三十: 第一天 2008年4月19日 香港仔運動場

期待左好耐既饑饉三十終於在3號風球下如期舉行, 眾多收到入營信的人陸陸續續在風雨中進場, 每人身上都加添了雨具或全身濕透. 非常狼狽啊!




入到會場, 大家都找回自己所屬的組別及組長, 但因天雨關係, 原本是在草地上集合的, 現要轉到看台上, 看~~2500人要全部走上這看台, 真的承受得到嗎? 真的有點兒心驚添, 還不止這樣, 因我遲到關係, 到達時已全場滿坐, 找不到位子來, 只好企到圍欄旁邊, 給這麼大風大雨一把一把的打落黎, 全身都濕透了, 回家後更有點著涼了的感覺.




當等待著大會安排期間, 雨勢亦越落越大, 草地上頓時變成澤國, 天文台亦宣佈紅色暴雨警告訊號現正生效, 真擔心晚上怎樣睡覺? 那裡睡好?




終於等到八時多, 大會聲稱這球場不太安全, 宣佈活動要腰斬, 大家要回家自行饑饉, 明天還要看天氣才作出安排, 暫時不知道會否再次回來.




正當大會安排各人離開時, 天文台已改發黑色暴雨警告訊號, 此時大家都要留在安全地方, 我地又要回到自己的位子上, 不能離開, 今次暫別後, 明天不知道會否重返, 於是各人都堅持來個雨中合照, ~~我們這班風雨同路的英雄, 無懼風球, 無懼黑雨, 面帶笑容的迎接未知的明天來臨.




後記: 雖然要回到家中自行饑饉 (我當然不會偷雞食嘢啦), 但感受最深的就是可以回到自己的被窩裡, 這暖暖的感覺, 給我感受到其他因天災橫禍已失去自己家園的人, 瞓不好, 食不好的那動感覺.

2008年4月16日 星期三

夏麵館@圓方

去圓方除試食左漢堡包外, 仲去埋夏麵館食嘢添, 因當日睇完戲尚早, 見無咩人等位咪入去試下囉 (記得之前黎開都見哩間嘢排晒隊既), 雖然話唔使等位乍, 但入到去都坐滿晒人, 唔通真係咁好食




本來點的是蝦爆鱔背煨麵既, 但送來既變左係淨鱔背煨麵既, 算把啦, 我地點完菜都要等成半個鐘至有得食架, 唔改正勒, 食左先算. 個麵本身其實唔係咁啱我食, 為的是食餸啫, 好在時間尚早, 唔覺肚餓, 所以碗麵就............(都算幾好既, 麵同餸分開上, 未至於整到的餸淋晒)




紅油抄手, 我食親上海嘢必點既菜, 哩度既紅油只係一般, 完全唔辣, 對於我哩個愛辣既人, 唔多啱食, 不過勝在粒抄手的餡都幾ok, 味道啱啱好.




菜心獅子頭, 超大粒, 之前係出面都係一大班朋友叫開我至會試一兩啖既, 但今次見隔壁枱話好食, 咪點黎試下囉, e.....又真係幾好喎, 食過咁多次既獅子頭, 哩度都算係最好食喎 (以我食過唔係好多次既經驗).

另外, 值得一提既係, 唔知點解佢地會收茶錢囉. 我地一坐底就放兩杯茶落黎, 之後埋單先睇到要茶錢既 (其實都無所謂$3啫), 但奇就奇在坐我地隔離有兩公婆 (佢地入坐先既), 男果個一見到我地坐底就有兩杯茶放係度, 於是佢自己問仕應要兩杯茶, 但哩間嘢既服務真係好麻麻, 佢叫左好多次都無人攞茶比佢, 點知佢咪發老皮囉, 佢話點解人地有茶佢地無喎, 當時個女人有放左支水係枱面架, 無幾耐就有人攞左2杯茶黎, 但佢地都差不多食完嘢, 於是攞左黎只係飲左2口乍, 我唔知係咪其實可以唔要茶呢? 好似今次咁, 若佢地一路都無叫個仕應攞茶黎, 咁又係咪唔收錢呢? 咁飲就收錢, 唔飲就唔收錢, 我地入黎時都係咪要問聲我地呢? 佢地用咩黎做收錢既準則呢?

地址: 尖沙咀柯士甸道西1號九龍站圓方1樓1079-82號舖


2008年4月15日 星期二

餃子試食篇

我鐘意食餃子就係人都知勒, 都不知有多少日子是以餃子當午餐的(實在太多太多了), 但每次買回來的多數都是灣仔碼頭水餃, 自己都開始食到有的悶添, 又想試試其他選舉勒(上次有點把我嚇怕了), 今次找來百佳凍櫃裡的思念牌水餃, 呢個牌子有多幾隻味選舉既, 我就揀左"三鮮灌湯餃子"味.




已經包好一袋袋放在凍櫃裡賣的, 一包大約25隻啦, 成惠$22.5.




size比灣仔碼頭水餃細少少, 食落口好似新鮮過灣仔碼頭果的, 要求唔高既, 買定放係屋企睇下門口, 隨時想起都可拿來吃的, 總算方便.