這個是行街街時派的
這牌子初出時都買過其他味道來試
比較喜歡山楂味的
試埋這款看看如果
味道只熟一般
應該取代唔到山楂棒既地位
但這款賣點是加入192mg鈣
能預早防止骨質疏鬆
都唔知得唔得既
2010年5月31日 星期一
2010年5月29日 星期六
2010年5月28日 星期五
潮味居@灣仔
生日飯黎講我好少會揀潮州菜食既
但這間[潮味居]好多人都話好食
以我既性格
好唔好都會一試既
鵝肝
(自己對肝類其實麻麻地, 但唯一一間我覺得好食的)
鹵水鵝片
(都幾入味, 但始終都係一般啫, 可能唔係我杯茶卦)
煎蠔餅
(煎得比較乾身, 蠔仔算幾大粒, 食落還可以啦)
炸蟹棗
(脆炸嘢, 點會唔啱我丫, 最好大碟的, 一人兩粒就正喇)
方魚芥蘭
(食完至知餸名, 所以無特意搵方魚黎食, 唔知咩味呢, 但整碟菜味道唔錯)
蝦子桂花炒魚鰾
(未食過炒魚鰾, 叫來試下, 但其實咁樣炒完之後, 覺得自己食緊肉碎多過魚鰾囉, 不過真的幾爽口)
鹹菜銀杏豬肚煲
(成煲嘢我只係鐘意食D豬肚乍)
蝦丸竹笙燉湯
(個湯好好飲, 唔似味精湯, 加埋竹笙, 啱晒我既口味啦)
糖醋兩麵黃
(個麵底用油炸兩面, 又係脆炸嘢, 當然啱我啦, 但敗北之處就是我加入了鎮江醋, 這個味道完全唔啱我, 下一碗只加砂糖, 效果即時返晒黎, 好味好多)
地址: 灣仔寶靈頓道2-16A寶靈大廈地下D&E鋪
2010年5月27日 星期四
文華雞飯 (新加坡)@尖沙咀
這間飯店想試好耐
上次來到時踫啱休息
等了好一段日子
趁這次約了朋友到尖沙咀飲茶
夜晚便順道過來看看有沒有位
真好彩
雖然店子細細
剛巧來到時店內有張雙人枱
如果唔係就要坐出面露天位喇
沒有冷氣
現在二十幾度真的好難頂啊
(店內3張雙人枱, 店外只有2張大圓枱)
一場黎到
點了2款新加坡很有名的
海南雞飯 & 肉骨茶
[海南雞飯] $33
其實對海南雞飯認識麻麻
唔知點叫正宗
點叫好食
感覺上跟普通滑雞無咩分別
味道總算唔差
但個雞飯就幾好味
尤其是除雞油外
飯低更加入醬汁
我覺得個汁撈飯幾好味
有少少似鹵水汁但又無佢咁鹹
[內骨茶]$33
我自己對內骨茶沒太大好感
在香港試過1-2次
媽亦買過湯包反來煲過
但我都不太鐘意那種味道
只是在馬來西亞喝過當地之內骨茶覺得比較好飲
所以今次沒有太大期望望
只是朋友想食便來一個吧
點知............
超好味喎
真的無諗過係這種味道
馬來西亞飲的是很濃郁的當歸藥材味
原來新加坡的不是這樣喎
沒藥材味之餘比較容易入口
只是落太多胡椒粒令到個湯有點辣
反而這方面我不怕
便覺得好飲
湯渣方面都好唔同
記得馬來西亞飲的有一大碗什麼什麼肉
整碗湯滿滿的都是渣
看這個
只有排骨及豆腐卜
但兩樣嘢都好入味
所以除左湯好飲D渣都幾好食
對於我來講
一碗便吃飽我啦
還跟餐來了碗油飯
$33覺得有點超值添
跟餐還可以加$3/$4配凍飲
左: 柑桔檸檬優各
(味道有點像柑桔+益力多, 雖沒特別, 但味道酸酸地, 啱晒我.)
右: 榛果奶茶
(出奇的好味喎, 比起台式奶茶店沖出來的還要好味, 飲得出唔似台式果D沖粉出來咁, 怎有驚喜.)
地址: 尖沙咀柯士甸路15A柯士甸大廈D舖
2010年5月26日 星期三
天麻川芎白芷魚頭湯@鴻福堂
[天麻川芎白芷魚頭湯]
近排個頭有少少痛
聽人講天麻川芎對頭痛幾有幫助既
自己又唔識煲
走左去鴻福堂買湯包飲就算
都幾方面
只要成包放入水度煲滾
一陣就有得飲
個湯好清
飲落口唔似有加味精
但唔知天麻定川芎陣味真係唔太啱我
下次都係買其他味好過
2010年5月25日 星期二
儂京川滬菜館@尖沙咀
我地幾個老死
每年, 每次, 個個生日都差不多會選日本菜的
因為我地全部都喜歡麻
就除左這一位...........四月生日的朋友
而我和這位生日之姊妹
每年都是一齊慶祝的
今年在未約好時間食飯前
已為她準備了不再食日本菜
揀來的食店經各人同意後
選擇了尖沙咀的儂京川滬菜館
本來還決定了最平之合家歡套餐
但各位BOSS想食好D
所以點了這個
[良朋雅聚宴套餐半席]
江南五色拼盤: 茶燻魚, 鵝片, 醬青瓜, 醉豬手, 涼拌粉皮
(茶燻魚: 味道甜甜地, 唔太乾, 幾好味
鵝片: 無咩特別, 好厚肉
醬青瓜: 個人喜愛酸一點, 加辣, 加芝麻仲正
醉豬手: 好濃酒味, 其中一位朋友仔既至愛
涼拌粉皮: 我無食, 好快就比其他人搶晒)
錦繡鮮蝦仁
蝦子蔥燒海參
(好厚海參肉, 但不見到有蝦子, 味道尚算唔錯)
砂窩雲昋雞燉魚翅
(每碗起碼有三梳翅, 火腿味道太鹹)
砂窩雲昋雞
(雖然話煲完湯, 但唔算太鞋身, 只因太多餸所以放棄無食)
酥炸雙味
脆炸魚塊
(面既芝麻無咩問題, 中層既魚都可口, 但底層既麵包炸都太油令整件魚塊失色)
京都醬骨
烤北京填鴨-鴨肉
(鴨肉片都太厚, 而且本身唔夠肥, 所以燒出來的鴨肉唔夠香)
烤北京填鴨-皮
松子桂花魚
(我唔太識食魚, 對於我來講還算可以, 但朋友仔話魚肉味唔夠)
上湯百頁津白
(又係火腿太鹹, 但其餘食材味道剛好, 尤其是津白, 夠淋, 入味)
灌湯小籠飽
北京炒拉麵
(唔似拉麵, 又無咩味道)
高力豆沙
(做得幾好, 食得出蛋白比例多, 又唔太油口, 我食左2個)
鮮果拼盤
後記:
其實當晚來了一位不速之客"小強"
所以陣容方面即變成六女一男
其中一位女經理好好人
見我們只訂了半席(6位)
小籠飽及高力豆沙即為我們免費增添一份
免得我們不夠分麻
但往上再看多一次圖片
每碟份量都非常多
我諗12人都夠食呀
我們七人好不容易才搞掂
如果不是有這位不速之客
我們起碼有一半多既食物要打包呢
地址: 尖沙咀諾士佛臺1號3樓
2010年5月24日 星期一
2010年5月22日 星期六
2010年5月21日 星期五
2010年5月20日 星期四
滋味2重賞@許留山
許留山最近做緊龜苓膏PROMO
凡買任何產品
可以特價$12換購[迷你龜苓膏]2盅
有兩種味道可供選擇
[靈芝龜苓膏] 及 [特種龜苓膏]
靈芝龜苓膏比較重藥味
但食開龜苓膏的就會覺得味淡
而特種龜苓膏味道有少少薄荷味易入口
最啱D初哥食
我自己一向有食開龜苓膏既習慣既
但許留山既就第一次試
印象真係麻麻地
圖中可見
尤其是特種龜苓膏
水汪汪咁
一D都唔膏喎
可想而知入面有幾多料啦
又或是放得太耐已出晒水
咩都好啦
總之見到就唔開胃
隨買龜苓膏外
第2重賞就是加$15可換購
[芒果流心] 或 [水蜜桃流心] 2 客
這個比龜苓膏好得多
起碼唔會水汪汪
但相返比較結實
什麼生果流心
其實咪又係布甸一客
不過這款布甸味道唔太甜
清清地都OK既
至於入面既所謂流心
真係唔知咩黎
又唔咩味
好似有點多鬼餘咁
芝果流心都係一樣
像是自己用啫喱粉+魚膠粉弄出來的布甸
味道一般
點解唔試下用新鮮果汁去做呢
可能比較受歡迎喎
之前懶係靚咁反轉倒出來食
但真的不太方便
都係留在杯子裡食比較好
訂閱：
文章 (Atom)