Haagen-Dazs Buy one Get one free

購買雙球雪糕一客, 即可免費享用多一客(任何口味).

條款: 只限外賣使用, 優惠期至2009/02/15

年初四開工大吉

祝各位開工大吉

紅盤高收

講返過年前先

忙..忙..忙..

忙左成個星期

為的都是搞作下d糕點

蘿蔔糕, 芋頭糕當然唔少得啦

傳統糕點由呀媽出手

承接上年整既椰汁魚魚糕外

今年再整多左種放入糖水內食既

雪耳木瓜蒟蒻魚

唔想年年都係整同款賀年糕

另外仲整左多好有意頭既

~ 黃金糕 ~

第一次整就見到一絲絲既內心

算幾成功啦

小朋友一向都唔鐘意食賀年糕點既

再為佢地整埋菠蘿蛋糕

軟綿綿

幾好食架

整好晒所有糕點後

安心於新春期間四處拜年

但尼兩個禮拜

仲有好幾個團拜要去

都唔停得

繼續整..整..整..手信啦

海味芋頭糕@囍宴

仲有兩日就過年喇, 我地屋企年年都擺放住唔少既糕, 自家整既又有, 朋友送來既xx年糕, xx蘿蔔糕又有, 今年最意外既係收到尼盒由 Jacky Yu 親自主理既芋頭糕, 平時係電視睇佢講飲講食就多, 唔知佢既手勢係咪真係掂呢?

首先, 論包裝都算幾靚, 傳傳統統咁, 又紅又雙囍字, 中國人過年麻, 係咁至似樣既,

論份量一樣唔弱喎, 成份入面仲包括埋我鐘意食既蠔鼓添, 以往食開其他芋頭糕無架, 多手既我就去秤一秤佢, 嘩! 一個8"糕居然差唔多2斤重, 應該都真材實料既, 好期待試食果一刻添.

蘋果蛋糕

天氣咁凍, 連放係度既生果都唔想攞黎食, 但又無理由比佢放係度變壞架, 等我諗諗去先, ~呀~不如將佢變做熱食, 咁咪唔怕凍冰冰咁放入口啦. 

一於係咁, 整個蘋果蛋糕先,

呢個蛋糕無咩特別, 只係搵左d蛋糕材料, 撈埋一齊, 再放d切細左既蘋果係面,

點知焗左出黎既效果又幾好喎,

返正整左咁多舊, 分比其他朋友仔一齊嘗嘗至得.

南乳吊燒雞翼

早前工展會那裡買回來的南乳吊燒醬, 今日終於解封, 根據樽上見議, 一斤重雞一隻, 可用半樽南乳吊燒醬製作吊燒雞的, 不用加其他調味料, 看似很簡單, 於是照辦主碗咁加以改良, 製以下既南乳吊燒雞翼喇.

材料: 大隻雞翼十二隻, 南乳吊燒醬3湯匙,

做法: 沒有加任何調味料下, 只用上吊燒醬醃雞翼一個多鐘,

排好於焗盤上, 入焗爐180度焗20分鐘,

出爐後之製成品.

食後感:

根據樽上指示做出來的雞翼, 樣貌, 顏色都算ok, 但食落口, 味道又不是差, 但不甜也不咸咁, 不是我心目中那款南乳吊燒醬味, 心諗, 如樽上指示, 整出來的燒雞.............唉! 不感想像喇.

超大金蠔

每年, 要到過年前幾日, 才會有這麼大隻的金蠔售賣, 我一向都喜愛吃生蠔的, 但現在沒什麼地方可食到好吃的, 見到這金蠔, 唯有轉戰熟蠔吧.

看到咁大隻的蠔, 令我想起街外食到的砵酒焗蠔, 試過到超市搵, 但沒有發現, 想知道那裡可找到砵酒, 還想知道砵酒其實是什麼酒來的, 好像沒聽過有人拿來飲喎.

後補:

經我煮熟後既金蠔

(煮得乾到死, 好似有點失色添)

煙肉三色椒卷

平時好鐘意食炒辣椒既我, 尋日想試試這款煙肉三色椒卷, 看上很容易做, 但自己動手, 可不易啊!

先將三色椒洗淨, 切條, 用煙肉卷起來, 我還在收口處泊上生粉,  

放落鑊煎, 起初, 還可以, 但煎香一面後, 將它返轉時, 第二面煎煎下會散出來,

最後, 唯有將之炒成一碟便上枱, 味道當然可以啦, 但賣相就.......

ps: 想問問各位, 點解我已泊上生粉於收尾處, 但還是散出來, 是否有其他更好的方法卷起它, 請告知

新翠華煲仔飯@銅鑼灣

天氣凍除左食蛇補一補外, 另有最佳之選, 就係煲仔飯喇, 自己都試過係屋企煲, 但始終無個種炭燒既味道, 而且就算係出面食, 都唔係話間間都炭燒架, 我最常去既就係le間, 新翠華茶餐廳喇, 門口出面擺放左十幾個炭爐頭, 即叫即整, 通常去到都要等位既, 但可以等位其間, 點定食咩先, 一坐低就差唔多有得食啦, 因為即叫即整既關係, 要等差不多20分鐘架.

這個是我最愛的排骨田雞煲, d田雞調得好好味, 加上用炭爐煮出來的飯, 焗一焗, 嘩! 打開時陣陣田雞味, 正呀.

另外還點了北菇滑雞煲, 覺得雞味焗入煲仔飯裡, d味好夾, d雞本身就已經好新鮮, 食落口又真係好滑, 一d都唔老, 平時晚餐時份我都好少食飯既, 但來到這裡食, 我自己一個人都食得晒整煲飯架, 實肥死啦.

地址: 銅鑼灣登龍街十二號地下

唧槍曲奇

經上次大量整作曲奇後, 慣用的曲奇唧筒給我弄爆了, 還未來得及買另一個, 已經有朋友仔於聖誕節時送上這款唧槍給我,

第一次用唧槍來做的曲奇, 形狀扁扁的, 沒紙盒上看到的咁靚, 可能我唔太識用這支槍啦,

當我把臂壓下時, 不是次次都弄得出來, 有時只壓下形狀但黏著槍咀, 有時連形狀都唧不出來, 是否我用得不當, 或是食譜與平時做曲奇的有所分別呢?

希望有用開這曲奇槍的朋友, 給我提提意見吧, 謝謝!

冬天補補身

天氣凍, 第一時間便想起糯米飯及蛇羹, 晚餐便來這個吧, 自己煮的糯米飯, 配料方面都係冬菇, 蝦米, 臘腸, 炸菜, 花生......., 今次嘗試下將煮過既糯米飯用易潔鑊炒下, 真的香好多喎, 尤其是的配料, 粒粒都好乾爽, 唔會有淋晒既感覺,

另外, 係樓下買左碗大蛇羹返黎加料, 入面真係有好多蛇肉架, 加上老闆比左兩大包脆脆我, 配埋d檸檬草, 好正呀, 係屋企食, 唔駛走來走去, keep住d warm麻,

太平山頂

星期日雖然天氣好凍, 但趁天氣好決定上山走走, 去左蘭芳園食完個豬扒包, 就沿中環行過金鐘撘纜車上太平山喇,

每次撘纜車, 我都唔鐘意坐定定既, 次次都要企係後排, 覺得自己好似玩緊機動遊戲咁,

不一會就上到黎喇, 經過小販當口都要行去睇下有咩大師作品,

望左一陣覺得le幅灣仔街景畫得最靚,

一邊行, 一邊都鐘意影下相既, 但我無咩攝影工具架, 只係用部手機周圍影..影..影..

影到le度, 你地睇係咪好有外國feel呢, 好似d過山火車路咁,

用手機都影到le張山頂相, 我收貨架喇, 算係咁啦, 下次要攞部大機上黎影至得,

太耐無上黎喇, 觀景台下面安左個大電視係度, 坐係廣場, 晒住大陽, 睇下電視, 爽呀,

咁凍, 仲有咁靚既太陽花既, 係咪好靚呢, 我好鐘意le種花架, 總係有種好開心既感覺.

紅酒燴牛尾

我好鐘意食牛尾架, 但通常都係出面食, 因無人煮過我食麻, 自己又唔識, 想食既唯有依賴人地啦.

最近見屋企有紅酒, 又無人飲既情況下, 不如諗下自己學整紅酒燴牛尾至得.

材料如下:

主角: 牛尾 (因我唔太識買新鮮既, 今次只買下些雪藏試試吧.)

配料: 甘筍, 番茄, 洋蔥 (這幾款材料只熟我個人喜好, 如食西芹既, 可加入西芹.)

數小時後, 就有製成品出場喇. (但顏色好似深左d咁喎, 係咪咁既樣呢?)

我就是跟著這個煮出來的, 但覺得煮出來的配菜味道比牛尾還要香濃好吃, 尤其是用配菜來餸飯, 簡直一流呀.

大盛日本料理@西環

每次撘車經過觀塘道, 都看到一間日本料理, 門前很多人的排著隊, 網上亦見好多人提及過這間店子點好味點好食咁, 很想一試, 但遲遲都未的起心肝的我, 終於比我等到, 西環開了這間分店, 好期待呀...........

坐底後, 第一時間當然點了些三文魚剌身醫醫肚先啦.

另點了一客炸生蠔, 都是我既飛化黎既,

除此之外, 還點了好幾款壽司,

因promotion關係, 三文魚壽司2蚊一件, 我地當然點了不少啦, 哈哈 (十件呀)

始料不及的結論:

一路以來都聽到這店舖之觀塘分店大受好評, 所以坐低後二話不說就點了這些食物, 最初吃三文魚剌身時都覺得沒什麼特別, 但當吃下幾度之後, 發覺有種說不出的味道來, 試看回最上圖, 三文魚~又不是不新鮮, 但真的沒三文魚味, 炸生蠔~外皮太厚粉, 食了第一件就不想吃, 其餘的壽司~都是同一個問題, 就是看上去不是不靚, 不新鮮, 但為何每款壽司/剌身都沒味道的, 平時以我食日本料理之份量, 以上的真的不夠, 但這次真的不想再點再吃了, 我好少吃東西吃得這麼不起勁的, 這裡, 總有種說不出的感覺, 只能說句這裡不是我杯茶啦, 不知食物那裡出了問題, 其他朋友如有同樣感覺, 請告知我這店子不好的原因吧!!

地址: 西環堅尼地城卑路乍街18號地下D舖

大除夕 大食會

由做冬, 聖誕, 黎到2008年最後既一日"大除夕", 日日都係食~食~食~, 想唔肥都唔得啦, 黎緊仲有舊曆新年添, 唉!! 到時又................

今次因為沒時間準備食物, 所以多數都係外賣就算, 有pizza box, kfc, 壽司, 沙律, 炒雜菜, 鹵水雞翼...........其實食咩都唔緊要, 重要既係一班朋友一齊開開心心過就ok啦,

~食~唔係今次主要既目的, 為的是大家想在2008年最後一日, 團結起來祝賀一番, 到外面趁趁熱鬧. 可能天氣凍既關係, 今年都唔算太多人出外睇煙火, 我地食飽飽後, 十一點才出發, 都搵到一個有利既位置, 睇得都幾清楚, 成班人都玩得好開心呀.