2006年12月29日 星期五

聖誕前夕小生命既來臨

都好耐冇update尼個blog嗱,  因為放假期間又唔得閑, 放完假後又經常上唔到網, 直到依家至有少少時間整理下自己的嘢. 我會續樣續樣POST上黎比大家睇既, 等下我啦.

講返尼個聖誕假先啦, 二十四號果日, 一早起身, 諗住比的"閔閔"我的魚仔食既, 點知比我發現魚缸入面多左隻蝸牛BB喎, 佢成個身透明既, 細細隻咁, 好得意架, 跟住幾日都有所發現, 每日發現多一隻, 夾夾埋埋依家有一大三細係個魚缸度, 日日睇住佢地變下大的, 變下又大的, 好似係自己既BB咁, 日日都期待佢既長大, 好有滿足感架.







蝸牛媽媽上方, 就是蝸牛BB勒.



你地睇下一隻1.5CM長既魚魚同蝸牛BB既比較啦.



2006年12月18日 星期一

公仔點心 - 叉燒包

尋日晏就肚餓想食嘢, 諗起之前買左一包包既公仔點心, 今次開個叉燒包黎試下先, 因為屋企無microwave, 所以將的包放係個碟度落鑊蒸, 點知蒸左五分鐘後.............

2006年12月14日 星期四

聖誕曲奇 (with Recipe)

我都好耐冇焗過嘢lu, 橫掂快到聖誕, 就試下整的曲奇先, 今次個質地整得幾好咁喎, 好乾爽, 個樣又靚, 正.

個食譜唔記得左幾時睇到於是抄低既, 好易整, 你地有時間都可以試下架.





材料:

牛油 100g

低粉 200g

糖粉 80g

雞蛋 1隻



做法: 牛油放軟, 加入低粉打勻後再落雞蛋, 最後糖粉分三次加入.

          用175度焗10分鐘, 即成.

2006年12月11日 星期一

工展會

一知道工展會開, 就第一時去掃貨, 今年想買既嘢特別多, 不過最後都係買左好多唔等駛既嘢返黎, 要買既又唔記得買咁啦, 次次都係咁既, 都好, 咪當試下其他新嘢咁囉.



等我介紹一下啦, 上圖最左角開始有我最鐘意飲既蘆薈小麥草3支, 川貝枇杷膏3支, 健康茶包4盒, 紐西蘭蜜糖3支, 鮑魚麵禮盒, 日式拉麵包, 蠔油, 無花菓, 大力鈎套裝等. 全部以食居多, 上列既嘢唔知我會食到幾時呢.



p.s. 買買下, 唔經唔覺咁買左幾百蚊嘢返屋企添.

2006年12月4日 星期一

新成員

之前都比大家見過我屋企既新成員啦, 魚魚是也, 前幾日突然又比我發現多一個新成員喎, 就係尼度蝸牛靱, 佢唔知幾時多入我地尼個家庭既, 又唔係我買佢返黎, 唔知點解會係個魚缸入面既, 我諗最有可能係買水草返來時連帶一齊返黎既, 咁咪即係買一送一囉, 哈哈, 都幾底喎, 初初發現佢果時, 佢好bb咁架, 依家就越養越大咁, 望落都幾可愛架.



2006年12月1日 星期五

豬肉乾





之前見到好多人都整過豬肉乾, 咁啱最近有個朋友話佢個仔仔好鐘意食但又唔夠胆買喎, 佢驚出面的豬肉乾唔乾淨, 我聽完之後咪諗住整比佢仔仔食囉, 於是就開始整第一次既豬肉乾勒, 今次係整之前都睇過好幾個食譜, 睇下邊個最簡單(我個人就最怕麻煩既), 睇左幾日其他既網站, 自己創出自己一個食譜, 係度可以同大家分享.



食譜:

半肥瘦攪碎豬肉 200g

糖 50g

毛油 1/4湯匙

紹酒 1/4湯匙

生抽 1/4湯匙

胡椒粉 少許



做法:

1. 將碎肉放入碎肉機加入以上所有調味料一齊攪拌.

2. 用保鮮紙包好碎肉, 用棍轆平約2-3mm之肉餅.

3. 預熱焗爐至120度, 焗20分鐘後, 再用175度焗25分鐘, 即成.

2006年11月27日 星期一

魚樂無窮

早前買了一些小魚回家, 養下養下都已經長大左唔少勒, 見佢地日日咁游呀游, 完全唔受任何事既影響, 繼續佢地自己喜愛做既事情, 我望著的小魚都想有種好似佢地既心態, 游呀游, 樂此不疲.







2006年11月18日 星期六

太平館

尋日咁啱睇左兩本雜誌都不約而同咁介紹左太平館既歷史, 又咁啱早前又去過果度食嘢, 更加加深再果度既記憶, 果日原先唔係諗住去果間度食既, 點知經過門口, 有朋友話覺得個門口同條長樓梯好有feel所以咪入去睇下囉, 其實之前我都試過尖沙咀果間既, 但今次黎到中環果間又碓實幾有特色喎.

記得上次去尖沙咀食果次, 仲未有瑞士汁既菜色, 只有招牌菜瑞士雞翼, 所以今次就試下太平館瑞士汁炒牛河, 出黎既顏色就唔多靚, 但係食落又真係幾好味喎, 甜甜地咁, 都幾啱我口味既.





而我朋友就係第一次黎食既, 佢當然會叫尼度既招牌瑞士雞翼飯($73), 佢都話幾好食架, 佢係出面都試過其他地方既瑞士雞翼, 佢話尼度果的真係唔同譜通雞翼果的咪, 出面食果的就同"老水"雞翼無咩分別, 真係尼度既最好食喎. 不過佢問我瑞士雞翼係咪瑞士傳過黎喎, 我都唔知架, 但係睇完雜誌介紹就明白晒勒, 原來初初推出尼款雞翼果陣個名係叫sweet wing, 但係有的人睇錯左以為swiss wing喎, 於是咪叫左瑞士雞翼囉.

2006年11月16日 星期四

士多卑梨慕絲蛋糕

之前攞左個焗爐去整, 到依家都仲未有得攞, 無咩嘢好整, 泡泡茶就提議我整慕絲蛋糕勒. 又係既, 咁耐都未試過整尼款蛋糕, 見人地果的整得好靚, 咪以為好難整囉, 點知泡泡茶叫我搵的簡單的既食譜, 都唔算難整既黎試下, 於是我就搵左為食貓尼個食譜試下勒. (不過我改左少少嘢)

食譜





都ok喎, 唔難整, 不過的手勢就無人地的整得咁好勒, 食落就幾好食, 唔係好甜, 啱啱好.

2006年11月12日 星期日

家變

星期五既下就, 啱啱食飽飯正想開工既時候, 公司發生左件好可怕既事, 果日公司入面其中一個女婿老世同另一個細仔老世因為少少誤會而大打出手, 更恐怖既係, 女婿老世居然攞住兩把刀出黎指嚇另一位老世, 在場同事見得心驚胆振, 場面就好似拍戲咁, 但坐係中場既我, 心情就有的唔同勒, 你知啦刀槍無眼, 我坐既位置又處於公司既最中間, 又近pantry, 佢地攞刀啦, 打鬥啦, 全部係我身邊發生, 其他人只是隔岸觀火梗係無咩所謂啦, 好在最後都無發生到血案, 但係過左好一陣子隻手都仲係不停咁振, 成個下就都驚到不能正常工作. (同亞媽講, 佢叫我快的食返的珍珠未添, 佢真係當我仲係細佬仔定勒)

經過尼一次既經歷, 又同屋企人商量過, 一於做到出雙糧後唔再繼續做勒, 搵過份安全的既工好的, 其實當時我入尼間公司時, 都有朋友叫過我唔好做一的家族性既公司, 但係當時我唔知咩原因, 依家一路做就一路發覺真係有好多不為人知既麻煩事, 都係早的抽身出來為妙.

2006年11月7日 星期二

果凍

今個星期攞左個焗爐去整, 無咩好搞, 去jusco八下有咩買啦, 點知比你發現到有洛神花既果凍賣, 於是買返屋企試下整, 初初諗住好似整啫哩咁, 一路落水一路攬, 越攬越杰咁, 點知攬攬下仲凝固埋添, 搞到差的整唔成形, 好在自己快快手咁放左佢落去個啫哩模, 咁至成到形, 依家先至知果子粉同啫哩粉真係兩樣嘢黎架. 佢果時係好唔同既, 不過食落口就一樣咁好食.



2006年11月4日 星期六

焗爐壞左 照整蛋糕

之前整左個兩個鐘既芝士蛋糕, 發現個焗爐可能壞左, 於是今日再焗多個蛋糕求證一下, 當然柬個易的既黎試啦, 就係海錦蛋糕勒. 今次個海錦蛋糕雖然都用左差不多一個鐘, 但出來既效果都幾好喎, 算係幾滿意之作啦.



係開心既同時, 就有個唔開心既消息.......就係:覺得個焗爐真係要攞去整, 真係壞左冇得再拖勒.

2006年11月1日 星期三

慘,慘,慘........整左兩個鐘既芝士蛋糕

前幾日放假, 妹妹話會帶BB同我一家出去食飯, 一知道會見到佢, 就立刻諗住焗個蛋糕仔比佢作為補祝佢既生日. 佢果朝早至打電話比我地話會出黎, 我又計過時間應該焗得切, 咪嗱嗱淋就開始整囉, 但係唔知出左咩問題, 平時用一個鐘就可以焗起既芝士蛋糕, 今次足足用左成兩個多鐘, 搞到整唔切攞出去比佢添, 都有的失望.  唯有留個蛋糕係屋企, 出完去返黎再搞過啦.



尼個就係用左兩個多鐘整既芝士蛋糕勒.



2006年10月24日 星期二

三姐海鮮飯店

妹妹生日, 佢自己柬左間位置好偏僻既三姐海鮮飯店, 如果要撘車去都唔知點行好, 位置非常"吊腳", 好在妹夫自已揸車, 咁就好昜去到.



至於尼間嘢好唔好食就見人見至勒, 我就覺得無預期咁好囉, 之前聽人講到好好咁, 都不外如是姐, 不過直得一提既係果度既例湯勒, 居然係一個藥材湯里既, 用料係唔知咩咩煲土伏零大山地喎, 個湯我就最滿意既, 其餘的餸就麻麻地, 的餸一到就急不及待即刻要試, 所以今次都係影唔切相, 浄係得的食浄既餸可以比大家睇下, 雖然的相都唔係好睇到我地叫左的咩餸, 不過都係度介紹下比你地知啦.



相中餸菜由下左至上右咁介紹啦, 有咕嚕大海蝦, 腰果豬頸肉炒茜芹, 砵酒煮鱔球, 秘製豉油雞, 炒駱駝峰, 鍋貼小棠菜, 魚湯腐皮卷, 最後再Order埋蛋白杏仁露.

我自己覺得個大蝦同雞就最好食, 其餘既就同出面的酒樓無咩分別, 不得不提既就後個甜品勒, order個時好期待會好正, 但係一食落口就發覺自己整果的仲好味過佢, 碗嘢又唔甜又無杏仁味, 都唔知自己食緊的咩.



將軍澳田下灣村34號地下

Tel: 2701 3136

2006年10月17日 星期二

逸東酒店

上幾個星期已經話過同媽媽去食自助餐既, 但因為前一輪自己身體唔好, 成日都病, 搞到依家至有時間去, 今次我地幾個去左佐敦既逸東酒店, 尼間嘢之前都未食過既, 今次都係因為有copuon所以至去, 點知去到至發覺原來唔係正式自助餐黎既, 係要柬一個main course之後湯, 凍食, 甜品, 先到係自助既, 媽媽話未試過咁樣食喎, 咪試下囉, 我地今次order左幾個唔同款既主菜, 有魚,

 

有豬,



仲有羊添,



order完之後就出左去攞湯, 佢地就即刻跟左個焗生蠔過黎



不過的嘢食全部都麻麻地, 反而最正既就係果度有人一邊彈結他一邊唱歌囉, 的歌就真係正到暈呀.

2006年10月12日 星期四

青葉日本料理 + 泡泡茶之手信

尋晚約左泡泡茶出黎食飯, 試下佢介紹果間青葉日本料理, 都幾ok喎. 之前仲聽個朋友講過話旺角果間唔係咁好食, 所以一路都無試過. 佢今次介紹果間青葉係o向觀塘既, 之前佢同朋友仔試過話ok, 咁梗係信佢啦, 一向都覺得佢話好既都唔會差得去邊既(越來越發現同佢既口味都好相似), 一於去試下啦. 入到去個感覺已經好好, 人少少咁, 又唔係咁嘈, 的嘢又細細碟, 最啱我地尼的咩都要試但又食唔晒既人架勒. 直得一提既係的服務員, 佢地全部都好有禮貌, 成日都見佢地笑笑口咁, 好nice. 泡泡茶好犀利架, 一坐低就急不及待咁點嘢食, 不消一回就成枱都係嘢食勒, 有時都唔知佢點左的咩架, 不過黎到見到都啱我食既, 無一不歡, 真係唔該晒佢勒, 次次都要佢負責點菜尼part添.

的嘢黎得好快, 食又食唔切, 影又影唔切, 都幾 lie hei 架.



泡泡茶話上次黎無雪米糍既, 今次見到有, 就不停咁點, 食到夠為至.



encore....encore....再encore.

青葉多面睇



另外, 泡泡茶剛從日本回來, 買左樣我好鐘意既手信比我, 尼款公仔雖然係dinesy既出品, 但就唔係咁多人鐘意勒, 仲唔係咁多地方買到添, 佢好有我心, 知我鐘意尼隻嘢, 一見到就即刻買返黎比我, 真係非常非常好謝佢勒.





好在我都有回禮, 就係佢平時好少整既椰撻勒.



唔知佢覺得點呢???

2006年10月10日 星期二

蝦麵店

記得之前同大家介紹過一間食喇沙既舖頭, 味道只係一般, 我仲話另外有一間特別好食既, 終於返去果度再食, 今次記得影返的相比大家睇勒. 尼間位於灣仔蘭杜街2號地下既蝦麵店, 地方少少, 但好多人, 一拎起餐牌只見幾款餸做主打, 加上佢地出名既湯底, 好味既湯麵就咁就出場勒. 佢地主要既湯底有兩款, 1)辣味蝦湯底, 2)咖哩湯底喇沙. 我自己就鐘意食喇沙多的勒, 今次同朋友兩個叫左蝦肉片麵同魚旦麵, 都係咖哩湯底喇沙黎既, 兩個都咁好食.





好似話中環會都多間分店添喎.

PS. 果日去到食食下麵, 居然見到有個女仔一個人去食, 佢手仲揸住個二德惠既膠袋, 坐係側邊位度, 見佢買左咁多嘢, 後來自己都行左過去果面買左少少嘢啦, 唔知當日果個女仔會唔會睇到尼個blog架呢.

2006年10月9日 星期一

中秋節過後

中秋節假期咁快又放完勒, 但係仲未想返工, 仲係想繼續瞓呀瞓呀, 又要等到月尾至有假放勒.

 我屋企通常o向假期後都會浄低好多餸菜呀, 水菓呀, 仲有就梗係月餅啦. 今年收到既月餅算係少勒, 尤其是奶皇月餅, 今年就只得半島酒店, 冰皮今年都少, 浄得大班乍, 其餘就有鴻星, 奇華, 翠享材, 海景軒等, 仲有的零零碎碎五仁月餅等, 總之數之不盡啦.



除左月餅, 水菓都特別多. 不過又係果句啦, 今年已經少左好多勒, 可能係我妹妹已經搬開左住既關係, 少左的人食嘢, 咪樣樣都少的囉.



尼的只係其中一部份要黎嚐月用既.

2006年10月6日 星期五

姑媽生日

今個月特別多嘢食, 又要做節又要食月餅. 今年仲多左姑媽生日都係十月份, 早幾日食左lu, 都係的飲宴嘢姐, 最特別咪就係佢地果度既壽包囉, 好鬼大個, 我之前見都未見過添, 特登影張相比大家睇下啦.





2006年10月4日 星期三

豆腐芝士凍餅 (with recipe)

最近, 行親超市都見百福豆腐有特價, 於是咪買左好多返屋企食囉, 點知, 放左係雪櫃, 唔係成日望住佢, 放左好耐都唔記得食, 仲阻住個雪櫃放嘢,  諗諗下, 不如用黎整嘢食啦, 記得之前唔知係邊果blog睇過人地整既豆腐芝士蛋糕, 咪自己又試下囉, 整完出黎當然無人地果的整得咁靚啦, 但係總算食得入口, 比自己60分啦.



材料:

蛋糕底: 低粉 60g

              蛋 2 隻

              泡打粉半匙

              糖 50g

              鹽少許

              奶粉半匙

蛋糕面: 芝士 90g

              百福豆腐花1盒

              糖 30g

              魚膠粉 10g

              淡忌廉 150g



做法:

1. 蛋及糖攪拌均勻後加入奶粉.

2. 把己過篩之低粉, 泡打粉及鹽拌入(1)成為麵糊.

3. 將麵糊倒入模後用力敲兩三下, 使內部空氣流走.

4. 以170度烤40分鐘後取出, 放在冷卻架上待涼.

5. 豆腐花先隔去水份.

6. 打軟芝士, 加入糖打至軟身.

7. 加入豆腐於芝士中, 打勻.

8. 打起淡忌廉,

9. 魚膠粉用水溶後加入芝士, 並加入(8), 攪勻.

10. 將(4)放在模中, 再倒入(9), 放入雪櫃雪2小時.



PS: 唔知係咪用左百福豆腐花(平時應該用布豆腐既), 所以整出黎之後唔係好夠豆腐味, 下次再試記會用返布豆腐既.

2006年9月18日 星期一

妹妹送上既少少心意

之前見好多網友都收到朋友仔自製既月餅, 我就唔咁多咁好既朋友勒, 不過我都有得收月餅, 係我妹妹送過黎既, 佢知我好鐘意食尼的節日嘢既, 佢一有都會攞黎比我(其實好多人都唔係咁鐘意食的節日嘢既, 除左我之外啦), 講反個包裝就好靚勒, 不過入面得兩件乍, 唔係咁夠食.





月餅來自: 帝京酒店中菜廳

2006年9月17日 星期日

雲尼拿酸忌廉磅蛋糕 (with recipe)

上次已經整過一次磅蛋糕, 不過唔係好成功, 今次繼續嘗試, 仲參考左泡泡茶既食譜加以改良, 出黎既效果都好滿意, 特此多謝泡泡茶既鼓勵. (真係唔好意思勒, 講左咁耐都未整到嘢比你食, 我會記得既, 等我整得有少少水準就會整你試食架, 尼次都仲係初試版, 你再等下啦, 一定有你份既).
食譜:

材料:

牛油 55g

糖 55g

蛋 1隻

雲尼拿香油 1茶匙

麵粉 60g

發粉 5g

鹽 少許

酸忌廉 60g

梳打粉 5g



做法:

1) 牛油,糖打至滑身.

2) 徐徐拌入蛋汁及雲尼拿香油.

3) 麵粉, 發粉篩勻備用.

4) 粉料及酸忌廉各分成兩份, 分別逐次拌入牛油混合物.

5) 將蛋糕料倒入長形蛋糕模內, 以180度焗40分鐘後待涼, 灑上糖霜, 完成.



原食譜自: 泡泡茶之雲尼拿酸忌廉磅蛋糕

2006年9月12日 星期二

日式芝士蛋糕 (with recipe)

上星期六放工時候, 個天好似倒水咁, 邊度都唔去得, 唯有返屋企啦, 返到去又發現無咩嘢好做, 最後都係選舉左整蛋糕囉. 今次想整既係日式芝士蛋糕, 最想整既原因係想睇下里款芝士蛋糕同我平時整果隻有咩唔同.
試過之後發覺同之前整既唔咩分別, 但係口感就好似之前果款好食的.

材料:

忌廉芝士     100g

牛奶             64g

牛油             22g

低根麵粉     13g

粟粉             7g

蛋黃            2個

蛋白            2個

糖                43g

塔塔粉        1/4茶匙



做法:

1. 忌廉芝士加入牛奶浸30分鐘。無鹽牛油隔熱水坐溶。

2. 浸30分鐘後隔熱水加熱,一邊攪一邊加熱至無顆粒,再加入己溶化的無鹽牛油拌勻,熄火稍稍放涼。3. 篩入低根麵粉和粟粉拌勻,再加入蛋黃拌勻。4. 蛋白打成粗發泡後,加入塔塔粉打勻,糖分三次加入打至企身。5. 取1/3的蛋白與麵糊混合,再將麵糊倒回蛋白霜中輕手混合直至單一顏色就好。6. 倒入模具,然後拿起模具在檯上輕敲幾下。7. 用蒸焗法放入己預熱的焗爐以170c 焗60分鐘至表面上色。8. 蛋糕可襯熱食,也可放涼後食,不用放入雪櫃。

2006年9月8日 星期五

狀元麵館

有日經過灣仔見到有間舖頭新開, 我梗係第一時間入去試下啦, 入到去見到個menu主打係小鍋米線, 我對尼樣嘢又特別喜好, 一於叫個辣味腩肉小鍋米線, 但係食落口又唔夠酸又唔夠辣, 我就覺得銅鑼灣果間雲南米線或者葵芳小雨天好食的勒. 另外我個朋友仔叫左浄係尼度先有得食既玻璃Q粉, 睇下係的咩......食落個感覺好似食梗河粉咁, 的粉就麻麻地勒, 不過的湯就幾好飲, 仲有入面有一串即燒既雞肉串都幾好咪架.



辣味腩肉小鍋米線 $23.-



磯燒鮑魚雞串燒沙爹湯Q粉 $28.-

地址: 灣仔軒尼詩道186號地下

2006年9月4日 星期一

酸忌廉芝士蛋糕 (WITH RECIPE)

因為有親戚係英國返左黎, 今次為左佢地第一次出招整蛋糕比佢地食, 之前的親友都聽過我媽媽講, 話我成日係屋企整嘢食, 佢地話又要試喎, 咁耐都真係未整過的咩比佢地試既,  見咁齊人就整我最拿手既芝士蛋糕啦, 雖然之前整過好多次, 不過今次又有少少唔同既, 係我第一次整既酸忌廉芝士蛋糕, 之前一路都唔知自己鐘意食個隻原來係酸忌廉尼既, 係有一次泡泡茶同我一齊出去食嘢佢話我知既, 咁咪又買黎試下囉.



食譜:

餅底: 克力格        4塊

           溶牛油       20g

材料: 忌廉芝士    150g

          糖                45g

          蛋                2隻

          低粉            8g

          粟粉            6g

          淡忌廉        200ml

面料: 酸忌廉        60g

          糖                20g



做法:

1. 忌廉芝士放軟後加入糖打勻, 再加入蛋打至滑身.

2. 加入低粉, 粟粉, 拌勻後加淡忌廉.

3. 將以上材料注入餅模內, 坐於已注水之焗盤上.

4. 預熱焗爐170度, 焗60分鐘. 焗至餅面變黃即可, 待蛋糕放涼15分鐘後, 加入酸忌廉與糖拌勻之料放於餅面焗15分鐘, 取出後可隨時享用.