2008年8月24日 星期日

Lunch Box: 三色椒炒雞軟骨+靈芝菇炒西蘭花

好耐無上黎喇, 有冇掛住我呢??我就掛c你地呀, 自從再返工之後, 都無咩時間坐埋部腦到, 打少左好多嘢呀.

以前9am-6pm通常都見到我係度, 夜晚就無咩人會見到我既, 依家~日又見唔到我, 夜又見唔到我喇, c未.

返左工2日, 咁啱鸚鵡就黎探我地, 呵呵!! 又多左1日休息, 正呀.

聽日, 星期一喇, 當然我都要繼續返工啦, 今晚一於整定過公司lunch box比自己先.




登..登..登..凳, 雞軟骨呀, 不過, 可能第一次整既關係, 無留意到雞軟骨既比例添, d椒切得太大片喇, 見椒唔見雞咁, 唉! 無法啦, 邊顧到咁多嘢丫, 我諗等我煮多2次, 熟手d既時候, 賣相會好好多既. (但話時話喎, 雖然個樣唔得, 但食落口都幾ok架)




另一味梗係唔少得啦, 都市人呀, 唔食多d唔健康麻, 但齋又"卦"得滯, 我就特登買左罐飽汁靈芝菇黎炒我至愛既西蘭花喇, ~吾~good喎, 飽汁好好味咁, 第一次買乍, 估唔到味道咁好添, 下次一於返炒尼味餸至得.

(依家少左好多時間用, 寫blog亦可能會減少左, 但你地唔好唔記得上黎探我喎, 我一有機會我返黎望望架喇, 放心啦!)

2008年8月18日 星期一

康和坊@中環

記得上次行開中環話想試下果間專食雞既舖頭, 今次終於過左去試喇, 又真係幾好味喎.




佢地餐牌的名好鬼靈精怪咁架, 上圖為: 精神爽利雞燉飯套餐, 包括藥材,雞燉飯1碗+有機菜1碟+金牌雞湯/有機豆漿/鮮奶, 都只係賣到48乍, 超低食啦, 尤其是佪燉飯呀, 好有藥材品, 入面加左咩參(我唔知叫咩參), 紅棗, 杞子, 桂圓.............再用埋嘉美少爺雞, d雞味好濃, 連碗飯都好有雞味, 雖然唔知d藥材食左有咩好, 但聞到成碗飯既味道, 已經覺得精神爽利啦.

整個套餐所有材料, 都係完全有機食材黎既, 咁既價錢, 低過食隔離果間喇沙王多多聲啦.

舖頭其實仲有個凍櫃係入面既, 有好多有機蔬菜同少爺雞售賣架, 下次要買d返去自己煮至得.

地址: 中環機利文新街30號

營業時間: 星期一至六上午七時至晚上七時 (星期日公眾假期休息)

2008年8月17日 星期日

簡易晚餐: 再戰螺絲粉

自從上次有blog友問過我, uncle pasta這牌子口感如何, 是否好食, 真係唔知喎, 我都係第一次食螺絲粉乍, 點知呢?  不過一向鐘意嘗試既我, 當時推使我試試其他牌子, 看看咩叫好食咩叫唔好食咁, 今次就找來以下的螺絲粉及醬汁來.




上次的dolmio我覺得麻麻地, 只知道是名牌, 第一次當然揀佢啦, 但今次一於看看別的, del monte都是大牌子之一, 好多款式, 我就特別喜愛肉味這款(只是我主觀的選擇), 而螺絲粉方面就買來這隻有fibre plus既, 睇落好似健康d麻.




感覺上, 食這些意粉類的, 通常配以肉類比較好, 今次就用煙肉加雜豆來煮啦.

做法: 先用煙肉粒起鑊, 無須加油, 煙肉會自動出油的, 當煙肉油出滿整隻鑊時, 可加入大量蒜粒爆香, 同時再放雜豆同煮, 炒兩炒後, 加入預先煮熟過冷河之螺絲粉, 再加入茄醬, 不停的炒, 直至每條粉都沾都茄醬為止.

溫馨提示: 這個del monte肉味茹醬比上次的dolmio好味得多, 但相對較酸, 我愛酸的當然無所謂, 如果不想太酸的話, 可加砂糖同煮, 茹醬內有少許肉碎, 比dolmio的淨茹汁更有口感, 螺絲粉方面, 唔知係咪fibre關係, 食落口真的有點粗糙感覺, 不及上次uncle pasta咁滑口, 兩次比較, 我都係覺得今次個醬汁 + 上次既粉好食d.

期待下次另一配撘啦.

2008年8月15日 星期五

久違了的十蚊紙

之前, 在那人的blog上看到blog友找來跟自己年紀一樣大的"紅衫魚", 當時覺得那張都不算太舊, 只是少見啫, 隨後還說過會找來另一張紙幣, 他一定未見過的.

找了好幾天, 終於給我找上了, 大家一齊來看看吧, 唔知有幾多個人是見過/用過這款十元紙幣呢?




正面: 應該是舊有之渣打銀行大樓, 但現己面目全非了.




背面: 好像是一個碼頭, 唔知係咪尖沙咀呢?  (我都唔知邊樹黎既)

記得這張十蚊紙是我小時候, 一次搬屋中, 被我發現在老爸的櫃筒裡, 那時已有收藏習慣的我, 第一次看到這張從未見過的$10, 真的很想據為己有, 於是問老父攞啦, 點知佢話唔比得我喎, 因為當時已經無人再用的, 佢以為我拿來是買東西, 說明原因, 他還是不給我, 說要交換喎 (有唔用得, 點解要交換呢), 要我拿$10元來才給我, 好換咪換, 好在我有利是錢啫, 來~~~交換吧.

直到現在, 我諗這張紙幣的價值, 應該唔止當時的十蚊卦.



2008年8月14日 星期四

身體健康

為左各人身體健康起見, 終於買左這款血壓計回來.




這款血壓計除可量度一般上/下壓外, 還可顯示脈摶跳動及偵測心律不齊的, 有左佢係度, 才發現原來家中除有血壓高之老人家外, 還有家人是血壓低的, 雖然血壓低並不是什麼病, 但都不要小看, 可能是其他病的表徵.

2008年8月11日 星期一

喇沙王@中環

假日, 又落左中環shopping, 未行街街之前, 想搵果間位於機利文新街, 食靚雞果間舖試試既, 點知去到見唔到有坐位既, 咁點食呀, 唯有行過二個舖位, 出左尼間喇沙王試下啦, 入到去, 住唔算好, 但都坐滿人, 心諗:一定唔差得去邊既.




上圖為雞翼黃薑飯, 雞翼尚算不錯, 夠香口, 但d飯就真係無咩薑囉.




另一碗係福州魚旦喇沙麵線, 睇個賣相就覺得幾好喇, 但點知食落口~~~~~~~~

點解....點解...咁淡, 無味既, 喇沙喎, 咁味既咩,  好似我自己係屋企煮麵咁味就算嗱, 大佬, 話晒都中上環區喎, 你咁樣邊企得著腳架, 個餐三十幾蚊喎, 都係比d咁既嘢人地食, 我覺得真係有點兒囉, 仲要話過你地知, 果杯跟餐既珍多冰呀, 佢話係特飲, 要加4蚊, 都無所謂, 但整好d麻, 杯飲品就無問題, 但入面既珍多冰.........硬到, 都未飲過咁難飲既珍多冰既, 出面果d綠色一條條既, 通常都好軟身, 好滑咁麻, 點會一條條硬到企得起身架.

唉! 算啦, 尼問嘢我都係blacklist佢喇勒.

ps: 食完喇沙王之後, 行過頭先話食靚雞果間舖, 今次有個人出左黎同我地講, 食飯呀, 入面有枱喎, 吓! 原來仲有入面架, 唔講既真係睇唔到喎, 早d講麻, 咁唔駛過隔離食麻, 我行左埋去睇一睇, 見到佢地d午餐都係$42, 同我地剛剛食完果餐差唔多乍, 我諗應該好食好多卦, 個男人係咁叫我地入去食, 我同佢講, 你早d出黎我咪入左去食囉, 依家食飽飽lu, 下次先啦, 佢一路笑著咁同我地byebye, 仲話記得下次要黎喎, 佢d態度都幾好喎, 下次真係要黎試試至得.

2008年8月8日 星期五

紅豆沙

第一次~~~又係我既第一次呀~~~~, 平時係糖水舖都好少揀佢既, 今日好掛住佢添 (邊係咁丫, 其實只係想食糖水, 但難既又唔識整, 咪.........),  聽說紅豆含豐富維生素 B1、B2、蛋白質及多種礦物質, 有補血, 利尿, 消腫, 促進心臟活化等功效, 再加埋有清熱寧心, 潤肺止咳, 補中益氣既百合, 就成了今晩既糖水喇, 依家至知原來紅豆有咁好既功效既, 咁真係要煲多d飲至得喇. 




今次只係從雪櫃裡找到這些材料, 下次一定會加埋蓮子既, 做個蓮子百合紅豆沙.




因為係第一次整, 份量方面只熟嘗試, 有待改善.

材料: 紅豆半碗, 乾百合10片, 果皮1塊, 水6碗, 冰糖少許

做法:

1) 紅豆備先用水浸一晚.

2) 乾百合及果皮先浸水, 果皮除後用鐵匙刮去內部白色物.

3) 煲水, 待水滾後, 放入紅豆及果皮, 大火煲約15分鐘.

4) 加入浸過之乾百合, 轉慢火煲至紅豆淋身, 落冰糖, 即可.

溫馨指示:

因為今次只熟試煮, 用料不太多, 水便落得少了, 所以唔可以煲得太耐, 會水乾, 這次大約煲上30分鐘便熄火了, 煲出來的紅豆有點像茶餐廳裡紅豆冰的紅豆, 有咬口, 雖不硬, 亦沒有煲到起沙效果.

如想煲出更淋身的紅豆沙, 可將以上材料加陪, 用慢火煲2-3小時, 煲到紅豆裂開為止.

2008年8月7日 星期四

八號風球下的一天

昨日北冕趕過來迎接奧運, 香港人又多了一天假期, 但這八號風, 真的沒什麼風, 沒什麼雨, 還有很多人趁這無風無雨的一天, 住外走走, 我當然是其中之一啦.






往海邊走, 原來一早便企滿了這樣多人喇, 他們很多都一家大細出動, 拿著魚牌/魚竿到來釣魚, 企了不到五分鐘, 又有魚上釣, 我不停的看呀看, 好能是打風天啦, 河床裡真的好多魚啊, 其中左下方拿著魚竿的伯伯收穫最為利害.






另外, 除了看到比平時多的人欣賞著釣魚及海面景色外, 還發現比平時多好幾陪的蜻蜓, 看上圖: 隨手一影, 便可影下多達二十隻了.






2008年8月5日 星期二

簡易午餐: 煙肉蛋撈出前一丁

平時好少食即食麵既我, 今日居然諗起..............出..前..一..丁.

無錯, 如假包換既出前一丁呀, 你地唔好以為尼樣嘢好普通喎, 對於我黎講, 真係一年都唔食一次架, 既然心血來潮諗起想食, 無理由就咁齋煮卦, 等我搵下雪櫃有咩物資可以用先,... ...登.......


只係搵到煙肉同蛋啫, 再加埋主角出前一丁麵, 咁就.............................



諗諗下, 橫掂開鑊煎煙肉同蛋, 不如唔煮湯麵喇, 整個煙肉蛋撈出前一丁啦,

我整得既做法當然唔難啦, 首先煲滾水煮開個麵餅, 滾2分鐘後熄火, 用凍水沖洗, 掠乾備用. 用易漯鑊煎煙肉至出油, 攞起, 用餘下煙肉油煎雞蛋, 生熟度隨個人喜好, 最後把已煮開之出前一丁回鑊, 加入包裝內之汁粉, 不停返炒至所有出前一丁都沾上汁料, 熄火加入包內之麻油, 食前加上黑/白芝麻, 搞掂.    




2008年8月1日 星期五

雪紡蛋糕

其實這款雪紡蛋糕不是第一次做的, 但每次想食便去做, 做了又趁它新鮮~即食, 到記得想影下盧山真面目時, 而唯時以晚.

今次終於記得喇, 還未出爐已記得把它的樣貌全影下來, 好讓自己過後返看.


入爐無幾耐, 蛋糕已開始漲起來, 很快便漲至爆裂, 但這時蛋糕應該還未熟喎, 真的好驚出來樣子不好看.




等呀~等~等到喇, 醜婦終需見家翁啦, 出爐後, 好在個樣都唔算衰, 都見得下人既, 食落口仲軟綿綿咁, 連自己都覺得好好味呀, 一個8"既蛋糕, 不消15分鐘便放晒落肚喇.

材料: 蛋黃4只, 砂糖 a)50g, 鹽半茶匙, 沙拉油60g, 水80g, 檸檬汁20g, 低粉100g, 泡打粉4g, 蛋白4只, 砂糖 b)30g

做法:

1) 蛋黃用手打蛋器打散後, 加入砂糖 a)及鹽, 打至可慢慢滴漏為止.

2) 一面加入沙拉油, 一面用打蛋器攪拌, 同樣地依次序再加入水及檸檬汁拌勻.

3) 加入已過篩之低粉及泡打粉於2)內.

4) 用另一大碗, 將蛋白打起, 再加入砂糖 b)打至有光澤為止.

5) 將蛋白霜加入至麵糊內, 再倒入模具中, 輕輕叩出氣泡.

6) 放入已預熱170度之焗爐中, 焗60mins, 出爐後即時取出倒扣放涼, 即可.