2007年6月25日 星期一

好舒服呀!

最近太陽伯伯一早就出黎活動, 未夠六點就見到佢笑晒口咁望著你, 試問我又點可以放過佢丫, 見到佢都咁早出黎, 我又跟佢早的出去行下先, 其實休息左咁耐我都無偷懶架, 雖然我無返工, 但係一向唔多鐘意"長瞓"既我都好早就起身, 唔會因為唔駛做而瞓到黃朝百晏咁, 尤其是今日仲特別早起身添, 你地估下............估我唔到尼, 係五點幾呀, 哈哈係咪好早呢, 六點多就出門口, 到屋前既海邊走一趟, 平時有時間都會出黎吹吹風既, 但真係無諗過一朝早黎海邊真係會咁舒服喎, 一向鐘情大自然既我梗係要影底咁美好既時光啦, 放係桌面, 時時刻刻都可以對住個咁靚既境.



2007年6月22日 星期五

泡泡茶的回禮

之前咪講過整蛋糕比泡泡茶食既, 佢都好客氣咁回禮比我, 仲有兩份咁多添呀,



第一份係戚風蛋糕, 嘩!好好味架, 好軟綿綿咁, 入口好輕身, 唔"流",



另外一份雖然係小小曲奇餅, 但佢真係好有心機咁整, 一的都無燶, 又用小小袋仔入著, 唔會梳氣, 可以等我慢慢食, 味道就當然一流啦, 又鬆 ,又夠牛油味, 我就最鐘意勒.

PS. 泡泡茶真係無話錯我既, 你睇....人地一絲不究咁做, 整得幾靚, 我都要學習下點樣跟足食譜去做至得, 下次一定要做個好好睇睇既蛋糕比佢再試過既, 加油.

2007年6月20日 星期三

第一次......

之前泡泡茶抱怨我從未整過蛋糕比佢食喎, 諗諗下又好似係喎, 於是今是特登做一個比佢啦, 但係泡泡茶一向整蛋糕都咁叻, 佢樣樣都識做, 相比起我做既當然係小兒科啦, 第一次整嘢比佢食, 梗係想比的驚喜佢啦.



個蛋糕係咪無咩特別呢, 其實內裡就與眾不同勒, 哈哈(食過你就知), 我無用到一般人用既海綿蛋糕或消化餅底, 而係用左兩層拿破崙夾著中間藍莓慕絲整(但我唔記得影佢既內心世界添), 係咪好創新呢, 外面仲學人蚊忌廉添, 再加少少藍莓做裝飾咁就完成勒, 原來蚊忌廉好難架, 我都蚊得唔靚, 好唔平滑哦, 泡泡茶問我跟邊個食譜整既, 我話佢知係我自己諗無食譜既, 仲比佢話我唔跟食譜做嘢添, 其實對於我黎講, 跟食譜真係好難架, 因為我多數整5"蛋糕, 出面既食譜唔係6"就7"都唔多啱用咁, 所以我都唔鐘意跟囉 (我一向做嘢都係無譜勒啦), 下次我會試下跟食譜再整另一款蛋糕比佢試既, 等下啦.

2007年6月19日 星期二

父親節 + 端午做節飯 (藍莓蛋糕)

星期日係父親節, 過兩日又咁啱係端午節, 媽媽話要就妹夫屋企正日食飯, 於是我屋企就決定星期日做節勒, 初初諗住出街食既, 不過好多食市都一早full晒, 唯有係屋企自己煮啦, 見今次咁齊人返屋企食飯, 我又好耐無整過蛋糕比佢地食, 一於媽媽做菜, 我做飯後甜品啦,

整咩好呢, 其實都諗唔到想整的咩蛋糕, 食黎食去都係芝士蛋糕, 唔知佢地會唔會食到悶晒呢(不過芝士蛋糕又係最受歡迎既蛋糕喎), 咁啦, 不如今次整我鐘意食既藍莓慕絲蛋糕, 還記得之前泡泡茶整過比我食, 到依家我仲好懷念果種口味, 不如今次試下自己整啦.

今次仲學人整左兩層慕絲添, 一層係藍莓另一層係酸酦地既桑莓, 兩層我都咁鐘意既, 不過今次整得都有的冒險架, 因為我無食譜, 整到出黎好唔好味都唔知架, 只係想唔好整得咁甜就ok, 因為我屋企的老人家唔食得咁甜既, 糖尿病丫麻, 所以今次特別落少左好多糖, 但整出黎既結果就..........



個味道啱啱好喎, 唔太甜, 好有藍苺同桑苺味, 好清, 哥哥仲好比面咁食左兩件添



另外因為父親節既關係, 所以今次一連整左兩個, 星期六已經提前攞左一個去男朋友屋企lu, 佢屋企人都好鐘意食甜品架.

2007年6月11日 星期一

心有靈犀

上星期五約左朋友仔去飲下午茶, 事前知道佢好鐘意食芝士蛋糕, 但咁耐我都未整過比佢食, 於是漏夜整左個藍莓芝士蛋糕比佢,



當日佢出門口之前話比我知, 佢知我鐘意食甜品, 咁啱佢仔仔個補習老師又整左芝士蛋糕比佢地一家人食, 於是佢拎左一件比我 (佢仲未知我整左蛋糕比佢食架), 我地一見面就..........芝士蛋糕相認呀.



不過大家既芝士蛋糕都唔同款, 各有各風味, 我見到佢果個3吋蛋糕好cute呀, 細細個咁.



面果層仲整得幾好味添, 唔知點整呢, 有冇人可以指教下呢???

2007年6月4日 星期一

食到黐左線

上星期晚同朋友仔一齊去整頭髮, 因為佢要做color, 所以搞到多夜至走得, 走時都差唔多9:30pm勒, 仲未食嘢添, 點算.......

諗諗下, 橫掂最近好少食宵夜buffet, 就咁決定啦, 放縱一晚, Go Go Go...

不過我地又無咩準備, 唔知去邊間好呢, 好左我地係响旺角, 點都唔會搵唔到嘢食既.

在彌敦道不停行, 不停行, 總會有人派傳單比你既, 平時我都好少攞既, 但今次就全部睇晒, 係云云傳單中最吸引既就係"常满百家菜"既buffet, 時間9:00-11:30pm $78 差不多一百款美食, 選擇都好多喎, 我同朋友仔都覺得佢地既京川小菜最好味, 我地一致推介北京黑醋骨, 川椒雞, 甜品就一定要試宮廷桂花糕, 晶瑩剔透, 從未食過咁有味道既桂花糕既, 我地仲一再encore添.

仲有: 直得一提既就係果樹有個大電影, 我地果日仲可以一路食一路睇溏心風暴添喎, 食得開心, 睇得開心.



 左圖: 花雕醉雞(上)/流沙蛋(右)/北京黑醋骨(下)     中圖: 樟茶鴨     右圖: 菠蘿咕嚕肉



左圖: 川椒雞     中圖:  酥炸雲吞     右圖: 醬爆野菌



左圖: 水晶蝦餃皇     右圖:  招牌小籠飽



左圖:  川醬炒班球     右圖: 紅燒豆腐    



左圖: 宮廷桂花糕(左上)/椰汁馬豆糕(右上)/芝麻卷(下)     中圖: 楊枝甘露     右圖: encore桂花糕
(其實唔此上面咁少既, 仲有的小菜送到黎之後就即時熱食, 所以唔記得影相, 比唔到你地睇添)

地圵: 旺角彌敦道613號飛逹商業中心2樓

電話: 3105 1589
P.S.服務員的態度好好架.