蝦乾雜菜湯

材料: 蝦乾, 秀珍姑, 芋絲, 素菜丸, 娃娃菜.

做法: 熱鑊下油, 先爆香薑片蔥段, 加入蝦乾炒至出味後加入適量分份, 鹽, 糖, 雞粉調味, 當水煮滾時可慢慢加入素菜丸, 娃娃菜, 芋絲及秀珍姑, 等水份再次滾起後加入麻油, 熄火, 盛起即可.

花生醬燒雞漢堡@Mos Burger

[花生醬燒雞漢堡] $20

唔覺唔覺

原來Mos Burger已經做到第六彈

即第六款包做特價

雖然我唔係款款都試

但不景睇返自己Blog時

發現都試得七七八八丫

如果唔係佢咁樣Sale一Sale

我都唔會食得咁多款啦

係Work喎

這款包既醬汁有D似燒汁架

應該係仲好味過燒汁

但唔知點解食極都食唔出花生味既

初時仲以為佢比錯左我添

味道算係好食既

如果唔鐘意食有黑椒既燒汁味

呢個算係好味既取代品

地址: 鰂魚涌康安街224號地下A1-A2舖

大自然素食@尖沙咀

約朋友仔飲下午茶

多數都係去富臨或小肥羊咁

食黎食去都係果D點心

無咩新意

其中一個朋友仔之前聽親友講過

美麗華有間食日本壽司素食既舖頭幾好味

於是我地又一行六人轉換陣地

這間素菜館

我之前在旺角返工時都食過架

印象中所謂牛肉同羊肉都幾好食

味道仲好過真牛,羊肉咁

知道呢間主打日本嘢既

當然要試多幾款刺生壽司咁啦

[雜錦刺身] $168

第一次食素魚生

感覺好似呀

加埋每人一碟既WASABI豉油

合埋眼一D都唔知自己食緊真定假架

[沙嗲羊肉串] $42

係我推介既

有個朋友仔係唔食羊既

都叫我地食晒去唔駛留比你喎

當然人一世物一世

明知唔係羊麻

咪試一舊囉

佢試完都話似到十足

唔覺自己食緊齋喎

[瑤柱黃耳蛋白翅] $88

有兩位朋友仔食開淡味嘢既

一口就話好好味喎

咁我咪第一時間飲下囉

唓! 呃人既, 又話好好味

其實都唔算差既

只係味道比較淡

可能係我食得太濃嘢卦

[軟殼蟹卷] $54

呢個真係一D都食唔出係軟殼蟹

黎到時仲以為係泰卷

但不論佢做得似唔似

食落口既壽司飯比起一些日式舖頭做得還要好

壽司飯加入醋既份量啱啱好

同埋最怕係出面食到暖飯熱餸咁

呢度溫度剛好

口人好舒服

[冰梅醬烤鴨] $78

好搞笑

我地食到最尾才知這個係烤鴨

一路食一路話

唔似喎, 唔似喎

出面好多地方都有得食齋咕嚕肉啦

都唔係咁既

個汁又唔咕嚕

搞咩呀

(味道其實有點像叉燒或燒豬頸肉)

[雜菜燒汁鰻魚粒] $78

個樣就唔多似喇

原來一入口就真係好似食緊魚既質地咁喎

點解呢

再加埋個鰻魚汁係面

完全啱晒平時無食魚既人啦

[泰和卷] $54

好在面頭加上沙律汁啫

如果唔係真係唔知尼個泰和卷同之前既軟殼蟹有咩分別

壓場既係

[原隻鮮菠蘿咕嚕肉] $88

呢個餸未黎之前

我地一路都對住碟烤鴨話唔似

見到咕嚕肉後

就知剛食緊的原來搞錯左

個個跟時又夾多舊黎試下啦

依家又話似鴨喎

都唔知係咪既

我就覺得似豬多過似鴨喇

講返尼度先

這個咕嚕肉正是出面齋舖食到的

用猴頭菇炸完再用咕嚕汁煮的

無咩特別

我自己都經常用咕嚕汁來煮食材啦

只是其中一位無飯煮婦想食咕嚕肉而點的

地址: 尖沙咀彌敦道132號美麗華商場2樓2005號

粟子酥@紹香園

去開紹香園買嘢食

多數都係買佢地最出名既合桃

今次見到$10包十蚊包既嘢

走埋去睇睇

揀左包粟子酥試試

細細粒

但好有層次

話就話係粟子酥

我一D都食唔出粟子味

但勝在皮夠酥

食下食下

一包好快就落晒我肚

香蕉芝士蛋糕

[香蕉芝士蛋糕]

材料: 牛油100g, 芝士80g, 糖180g, 蛋2只, 低粉200g, 泡打粉4g, 雲尼拿油少許, 香蕉1只

將所有材料拌勻後

放入舖上牛油紙之焗盤上

用180度爐火焗45分鐘即可

放涼後可隨個人喜好大小切片

我沒有將香蕉拌入粉漿中

而是倒入一半粉漿後再加入香蕉糊於中層

再倒入餘下以粉漿

所以看到蛋糕中央之香蕉清晰可見

聽說這蛋糕隔日比較好食

於是留下一半份量入袋後放入雪櫃試試

的確比剛焗出來的好食

地道魚肉燒賣@四海

四海好多點心都買過黎食

唔錯架

今次見呢款魚肉燒賣做特價

$11/2包

買定放係屋企

晏就或下午茶都有得食啦

一包有24粒

甜豉油2包

可分2次食

無須解凍

滾水後隔水蒸約12分鐘即可

軟綿綿好有魚肉味

覺得好食過街邊果的好多喎

計價其實差唔多啫

好彩買定係雪櫃

想食時得唔駛走落街啦

是日晚餐: 紅黃椒炒雞柳 + 番茄蛋

心想食的兩個餸

煮完出來才發覺.............

不謀而合的都是紅色+黃色

第一味係

[紅黃椒炒雞柳]

第二味

[番茄煮蛋]

bling bling

我的第一個冰冰完成喇

因為試做既關係

今次只是幫熊仔裝裝身

杏仁金腿豬肺湯@鴻福堂

[杏仁金腿豬肺湯]

諗唔到咁細細包既湯包入面都放了幾塊豬肺係度喎

唔駛洗唔駛自己煲又有湯料食

幾十蚊都買得過既

雜蠶豆@美味棧

零食對於我來講已經是不可少得的

我的牙仔最愛動

有咬口的就最啱我

今次又比我睇仲這款雜豆

色彩好繽紛

頓時變成小孩

見到咁多色彩都覺得好開心

紅,黃,綠三色分別為

蝦, 咖喱, 海苔

三隻味道都好出

一食便食得出來

初初食都覺得好好味

但越食就越覺得

自己好似食左好多色素咁喎

唔健康既感覺又返返來添

木耳午餐肉米粉

上日留了兩片午餐肉作今天午餐之用

還特意買來這款新竹米粉

再加入一些木耳

便成了今天的健康午餐

大顯"新"手

早前約埋Florence上左Blog友Shirley新居搞搞震

啱啱自己買樓搬出黎住既佢

當然好享受自己用既廚房啦

我地三人都是廚房新丁

胆粗粗咁諗左幾個小菜

想係屋企試煮

未學行先學走

一黎就諗住整返個魚蝦蟹餐

但最後因為買唔到大隻少少既蝦

所以轉整雞翼就算喇

臨場又發揮我地既創意小宇宙

將原先找來的食譜全部更改

變成以下四菜

[可樂雞翼]

只是亂來製作

但又幾好味喎

多得Florence既片糖心得

[蔥茸炒西蘭花]

原本最無難度既一個菜

比我發現原來我一直都搞錯切菜既方法

今次親身睇著人地做至知自己錯係邊

真係得益不少

[豉椒蒸白鱔]

胆粗粗既我只係問下朋友點整

就買左半條鱔返黎搞

第一次買, 洗, 煮都心驚胆跳

怕的是鱔身死後還會動的感覺

好彩都能順利完成

[薑蔥炒蟹]

去到街市才知蟹的品種很多

我地三個都唔知點揀好

企晒係度

剛巧見到有位太太正揀緊一款海藍色既花蟹

佢話比我地知用來炒都唔錯

咁我地就買左好幾隻返去試煮

其實炒蟹並唔難

最難在於點樣拆隻蟹

我同Shirley夾手夾腳好不容易咁搞掂左佢地

用多薑用蔥炒出來的蟹好夠鑊氣

差點連手指都食埋

加上我帶來的梅子酒

一啖蟹一啖酒

真是想心樂事

後話:

希望下次再有機會上去搞搞震就好喇

好多謝Shirley既招待

打擾晒

三本蝦漢堡@Mos Burger

Mos Burger今期既推介係[三本蝦]

見上次個吉列蝦漢堡都幾正

再黎試埋個三本蝦至得

今次ORDER左個餐

包埋薯條同汽水

盛惠$40.00

名副其實三本蝦喎

真係見到有三條蝦尾係樹

今次用既原來係肉醬汁

呢....肉醬意粉果D汁呢

食落唔係好啱我

我始終鐘意D肉醬用黎撈意粉多D

味道又比較淡

唔睇都唔知自己食緊肉醬咁

加上今次隻蝦無咩味

就算知道呢個係咩包

但真係一D都食唔出來

要黎玩遊戲比人估下就最啱喇

地址: 觀塘道418號創紀之城五期(apm)1樓美食廣場8號舖

脫模杞子桂花糕

第一次將紀子桂花糕放入模具內製作

原來脫模好不容易啊

尤其是這個魚魚

通常都給我把魚尾弄欄

唔知各位朋友仔有咩好方法令凍糕易於拿出呢

百樂門宴會廳@官塘

有次撘地鐵經過官塘站

抬頭一看

嘩!

鱷魚恤中心點解會變成咁架

記得以前係寫字樓黎

最低2層只有少量賣衫既舖頭

依家全部變晒酒樓黎既

咁多間其實邊間好食D呢

今日就由最頂層開始試啦

****百樂門宴會廳@下午茶****

[紅油炒手]

雖然唔係太正宗

但勝在舊雲吞有肉汁幾好食

[鮑汁鳳爪]

雞腳煮得好淋

唔太泣口

個鮑汁唔係好濃

呢個好快賣晒

隔離枱見我地食得咁滋味

佢地又ORDER

但已經賣晒LU

[椰絲糯米卷]

通常食糯米卷都係硬身

呢個又唔係喎

好軟熟呀

而且糯米又唔乾

值得推介

[魚翅灌湯餃]

圖中左手邊見到果少少係魚翅黎既

不過唔知係真翅定假翅啫

個湯有味但好清

適合D食開淡味既朋友仔

[家鄉鹹水角]

攞黎時熱辣辣

個皮都仲有少少脆

餡料唔算多

味道偏淡

[皇帝餃]

ORDER 時好期望呢個餃

唔知係咩黎

見個名叫皇帝餃

應該好勁咁

點知原來係我一向都唔鐘意食既皇帝菜

真真比佢呃到

我當然唔知咩味啦

一個都無食到麻

本來唔至咁少點心既

但有幾款都話賣晒喎

唔知係咪真係咁好賣呢

下次要再試返食唔到既

一哥蛋散

白玉千絲酥

翅膀雞窩

同

賽螃海鮮餃

你睇我居高臨下

對面就係官塘露天地鐵站喇

向上望仲見到無高樓大廈阻擋住既藍天添

嘆下茶

睇下風景咁

幾捨意

地址: 觀塘開源道79號鱷魚恤中心8樓