北海拉麵屋@銅鑼灣

經常行sogo既我, 通常都會行完晒sogo至出外面搵嘢食既, 但今晚又想食拉麵, 又想多d時間行街, 唯有落sogo樓下果間北海拉麵屋食囉 (銅鑼灣區其他拉麵店等位要好耐架), 之前都食過一次, 覺得都幾好食, 今次係返炒既, 上次黎已經見好多日本人黎食, 應該都有保證既, 唔會太差.

粟米拉麵:

雖則個名係粟米拉麵至喎, 但成碗麵入面唔止得粟米咁單調架, 有好多配菜, 但你地睇下, 所謂配菜, 連豬肉, 魚旦, 紫菜都有架, 係咪好似低d呢, 另外, 仲有要一提既係, 正宗日本拉麵, 除左order粟米拉麵外, 其餘拉麵都唔會另加粟米比你架, 如果你係出面食xx拉麵, 又見佢有加埋粟米比你, 咁其實果間已經唔係食正宗拉麵既麵屋黎架.

叉燒拉麵:

好多人都鐘意食日本既叉燒既, 舊叉燒又夠香, 又好淋, 好好味架, 不過配菜就少好多喇, 等你專心欣賞佢地整既叉燒, 尼個麵係豬骨湯底既, 所以餸少d都唔緊要, 成個麵配上個湯, 唔駛食餸都覺得好好味架.

ps: 你地有無發覺, 兩碗麵其實都有豬肉架, 但兩碗嘢既豬肉又唔一樣喎, 我試過晒兩款, 其實都咁好食喎, 但食落既口感又真係唔一樣既, 唔知有咩分別架呢

翠華餐廳@中環

自從返左工之後, 差不多晚晚都係出面食飯, 諗住食埋至返屋企, 又唔駛煮又唔駛洗, 快~靚~正~啦.

今晚諗起好耐無去過既翠華餐廳, 雖然話係餐廳乍, 但食物既水準好高架, 好多人都知, 我就最欣賞佢地周不時會有新款菜式出, 令人好有食慾.

先睇睇尼個賣相好吸引既鐵板京川蝦球炒兩麵黃 ($62), 其實都唔知點解叫兩麵黃架, 不過睇落好靚, 食落又好味就夠啦, 唔駛理佢什麼什麼名, 你地睇d蝦幾大隻, 好爽口, d麵又炒得乾脆, 個汁有少少辣既, 仲有d酸酸地咁, 好開胃架.

另外, 又點左個招牌嘢, 就係翠華特脆豬扒飽($22)喇, 無厄你地架, 一睇就知脆啦, 件豬扒又夠厚, 但最衰係唔夠灣仔街市果間餐廳d豬扒新鮮啦, 不過尼度就有大片菜撘夠, 睇落多似健康d咁囉, 唔想食飯既, 都係一個好既選擇黎既.

地址: 中環威靈頓街15D-19號地下至三樓

簡易晚餐: 黑椒雪魚柳+青瓜炒魷魚乾

少左好多時間係屋企, 想煮下嘢食都無時間添, 一得閒又黎搞搞新意思先.

後: 黑椒雪魚柳

前: 青瓜炒魷魚乾

雪魚柳買返黎後, 溫室解凍, 用黑椒, 胡椒粉, 鹽調味, 過30分鐘後, 落鑊煎香, 再加上日本燒汁, 搞掂.

魷魚乾先浸水至軟身備用, 溫室青瓜切片, 薑片起鑊, 見有少許煙出, 再落魷魚乾炒至出香味, 用蠔油一同炒至魷魚乾開始收縮, 把青瓜放下, 炒兩炒便可熄火, 上碟.

2008.9.1

又係新學期既開始喇, 好多人都怕今日會塞車喎, d朋友仲叫我一定要早d出門口呀, 如果唔係塞車都塞死你架.

我當然信佢地講啦, 今日真係早左少少出門口, 但原來今日對我黎講, 無咩特別影響乍喎, 同平時一樣用咁多時間啫, 聽日, 可以照舊時間出門口喇. 

照上星期既慣例, 出門口一直走到巴士站等車, 不消5分鐘便撘到果架"x"線既快車, 尼架車仲好似因為我既須要而增開咁, 在我返工前兩天才加開至碼頭站, 現在我每朝便可撘這班車到碼頭後再轉小輪直達公司, 認真正便.

上個月剛剛返工, 工作都算順利, 上班亦不算麻煩, 最開心的就是剛過去的星期五呀, 出第一次糧, 一計之下, 嘩! 我只工作了7天, 但公司足足出了12日糧比我呀, 都算賺多左一半丫, 開心死我喇, 當然其中出多的5日糧, 其實係星期六及日之salary, 而另外果日就係打9號風球果次, 佢地照出糧比我架, 嘻嘻!!!

好喇, 暫時講到咁多先, 我又要開工喇.