郭富城舞林正傳演唱會延續篇2008

之前係紅館開完演唱會既郭富城, 情人節期間又在機場博覽館再開舞林正傳延續篇, 上次買唔到飛既我, 今次終於有得睇勒.

係博覽館開四面場, 比起紅館既場地仲正, 坐位超近, 城城話: 就算坐山頂位都係比個台既水平高少少乍, 尤其是今次佢個台仲升得咁高添, 升起再旋轉時仲高過山頂位架, 所以無論坐邊個角度都睇得咁正.

今次諗住帶部大機出黎影城城既, 點知叉完電後放低左出門口時唔記得左攞添, 唯有又係用部手機影下先啦.

演唱會既氣氛相當之好, 我揸住個bonbon舞足全場, 都唔識得影相勒, 去到高潮位仲企起晒身一齊跳添, 呢幾日咁凍, 沃下個身個人都暖左好多喎.

記得上次入黎睇梁詠琪演唱會時左轉車右轉車咁, 坐成個幾鐘至入到去, 覺得好鬼麻煩, 唔想再有下次添, 但今次揀左坐專為呢個演唱會而開既機場快線, 又幾舒服喎, 仲要半粒鐘就入到去添, 咁大個女都係第一次撘機鐵乍, 感覺都ok啦, 最緊要快麻.

於演唱會當日買即日來回博覽館既車飛, 只係收$42乍, 都幾底丫. save time save money麻.

由於要係中環撘機鐵, 咁順便係中環食埋晚飯至入去啦, 天氣凍凍地, 所以揀左呢間食咖哩既舖頭~峇里閣, 入到去好快咁揀左個巴東咖哩牛腩麵, 個汁好野味架, 的牛腩都好淋, 你地唔好睇錯個碟係意粉喎, 真係麵黎架, 佢地將的麵滾完攞起再撈咖哩食既, 幾好味咁架.

另外仲叫左個串燒雞肉黃薑飯, 好其待既黃薑飯真係有的失色, 個飯又凍又硬, 又無咩薑味, 無知點解叫黃薑飯呢, 好在跟飯既串燒仲算過得去, 不過我都係揀左攞人地的巴東咖哩汁去撈呢個黃薑飯食囉, 咁樣個飯就變得暖暖地無咁凍食, 的飯又有返的味咁啦. 但我個朋友話, 呢間嘢晏就食既午餐就幾好喎, 晚餐佢都覺得麻麻地, 咁下次有時間既咪再黎試下午餐有幾正囉.

峇里閣:

地址: 中環卑利街35號地下

電話: 2854 1532