咩父母, 就有咩仔女. 小心!!!

較早前既一天, 去了太空館睇天象電影”探索黑洞”, 進場時懷著一份熱切的心情觀看, 但點知睇睇下受到隔離2位男仕既極度滋擾, 攪到我咩心情都無晒, 特別想到這裡同各位為人父母分享現今的家教有幾咁害人.



頭號人物B: 死衰仔 (年齡10歲左右)

疑似父親F: 好似好鍚個仔咁 (年齡30幾至40幾左右)

受害人C: 我



開場後不足10分鐘, 原先坐我隔2個位的B要求和F掉位, 於是B就正正坐我隔離勒, 事情就咁開始:

B: (坐係度無時停, 周不時舉高雙手, 一係又橫放隻手過黎我果面)

C: (心諗: 都係小朋友一個啫, 算啦………)

B: (繼續無時定, 今次仲企埋起身攪下張凳咁)

C: (大佬呀想點呀~~~~~~)

B: (故意用手肘踫我手起碼三次以上)

C: (已經咁多次嘞, 我應該要開口至得) 喂! 你坐好的得唔得呀.

B: (只係停左一會, 隔無幾耐又再三係度攪攪震, 繼續踫我隻手)

C: 喂! 你坐定的得唔得架, 唔想睇咪走出去囉. (說話講到一半之時)

B: (佢隻手申過黎開我放在大腿上的手袋)

C: 喂! 你仲咩開我個袋呀.

最精彩既部份黎嘞:

F: (佢聽到我話佢個仔, 出於關心個仔既佢就講) 咩事先, 開你個袋~~要唔要報警呀. (當然係用的唔好既態度講啦)

C: (好在我地隔離無人, 於是我同個FD講) 坐過2個位丫. (起身行2格)

F: (佢仲大大聲咁繼續講) 鬼唔望你無仔生呀.

C: (我聽到只係暗笑左一下, 因為識得我既都知我唔想生架啦, 佢點咀咒我都無用既, 哈哈哈, 我唔想嘈著其他人繼續睇戲, 所以無同佢鬧, 只係講左一句回應佢) 我睇你個仔第時大個變個咩人? 點對你? 我睇你點死?

直至完場, 因為我坐近走廊位, 所以睇完即時就起身行人, 點知又聽到佢個衰老豆講嘢:

F: 記著喎, 出到去記著報警喎. (用的得意洋洋既語氣講)



後記:

回想這兩父子, 總覺得個小朋友既行為唔係一朝一夕學到依家咁, 一定係的家長唔知點教佢, 攪到個細路變成咁都唔覺得係有問題, 個衰仔既行為雖然係唔啱, 但佢始終係個細路黎, 你點教, 佢就點學, 好似以上既例了咁, 明明係佢個仔唔啱, 個衰老豆唔即時話佢不突至, 仲係個仔面前鬧返人轉頭添, 你諗下個仔當時會學到佢的咩丫? 呢的咪叫身教囉, 現今既人, 個個話想生就生, 其實有冇諗清楚生佢事少, 教佢事大先, 生左出黎又唔教好佢, 十八年後想佢做個好漢都幾難啦, 我自問真係唔識點教細路, 所以好多年前已經諗清楚唔會生, 唔想做一個不負責任既媽媽, 唔想生左佢出黎之後由得佢自生自滅咁.